Мемлекеттік мүлікке жауапты тұлғалардың нешеуі сыбайлас жемқорлыққа жол бергені үшін қылмыстық жауапкершілікке тартылғаны айтылмайды. Бірақ, мұндай деректер бар делінеді. Елде де, Ақтөбеде де. Сыбайлас жемқорлыққа қарсы іс- қимыл бойынша ұлттық бюросының Ақтөбедегі департаменті басшысы Айгүл Үсенованың айтуынша, сыбайлас жемқорлыққа қарсы қызмет осы жылдың алғашқы тоқсанында елде мыңнан астам қылмыстық заң бұзушылықты тіркеген. Оның 87 пайызы - сыбайлас жемқорлыққа қатысты. Мемлекетке 3,7 миллиард теңге шығын келтірілген. Түрлі деңгейдегі әкімдіктердің қызметкерлері жемқорлар қатарында бірінші орында тұр. Екінші - полиция, үшінші кезекте - қаржы саласының мамандары. Ал, кәсіпкерлер әлеуметтік сауалнамада біздің елде білім, денсаулық сақтау, жер қатынастары және мемлекеттік сатып алу салаларын жемқорлық жайлаған деп көрсеткен. Былтыр парамен ұсталғандар қылмысы әшкере болған соң, мемлекетке жалпы сомасы 3,2 миллиард теңге айыппұл төлеген. Мемлекеттік мүлікті басқарудың тиімділігін қамтамасыз етудің бір негізі - сыбайлас жемқорлыққа қарсы мәдениет. Әкімдік қызметкерлері арасында осы мәдениетті қалыптастыру үшін сыбайлас жемқорлыққа қарсы іс қимыл бойынша ұлттық бюросының Ақтөбедегі департаменті мамандары қазір жергілікті басқармаларда ақпараттық- түсіндіру жиналыстарын өткізіп жатыр. Мұндай кездесулер статистика бойынша жемқорлық деңгейі жоғары білім, қаржы, ішкі істер, қылмыстық атқару жүйесі, мемлекеттік кірістер ведомстволарында өткен. Бюро өкілдері сыбайлас жемқорлыққа қарсы мәдениет қалыптасқан салаларда парақорлыққа жол берілмейді деген сенімде.