Есет батыр ауданында мемлекеттік бағдарламамен салынған үйлерге электр желісін өткізген жұмысшыларға "Ақтөбе сәулет" мердігер компаниясы 700 мың теңгеден артық ақша қарыз. Қосалқы мердігермен арада келісімшарт жасалған. Жұмысшылардың қолында қағаздары бар. Олар мойындарына алған істі де аяғына жеткізіп, тапсырған. Ал келісімшартқа қол қойған келесі тарап міндеттерін орындаудан жалтарып келеді."Азамат ЛТД" ЖШС-нің 6 жұмысшысы "Ақтөбе сәулет" құрылыс компаниясының басшысымен жолыға алмай жүр. 10 ай бойы құр уәдеге тойғандар мәселелеріне тиісті органдардың назар аударғанын қалайды. "Ақтөбе Сәулет" құрылыс компаниясы Есет батыр ауданында былтыр мемлекеттік бағдарламамен 5 қабатты үй тұрғызған. Осы үйге қосалқы мердігер серіктестік жұмысшылары электр желілерін өткізеді. Жұмыс құжат бойынша 700 мың теңгеден аса қаржыға бағаланған. Электриктер міндеттерін орындаған. Бірақ ақшаның ұшын да көрмеген әлі. Бүгін жұмысшылар "Ақтөбе сәулет" құрылыс компаниясына барды. Ондағылар қара жұмысшылармен емес "Азамат ЛТД" серіктестігі директорымен ғана тілдесеміз деген.