Заречный-4 елді мекенінің тұрғындары бүгін "Мектепке жол жоқ" акциясын өткізді. Сабақ басталуға аз қалды. Балалар мен ата-аналар №55-ші мектеп және "Нұрай" балабақшасына қалай жол тауып барарын білмей дал. Өйткені осыдан 10 күн бұрын бұған дейін халық қатынап келген жалғыз аяқ жол бітелген. Жеке кәсіпкер өзіне тиесілі жерді қоршап, жылыжай құрылысын бастамақшы. Негізі мынау бетон дуалдар кеше мен бүгін тұрғызылған жоқ. Аумақ ерте заманнан қолдан қолға өтіп келеді. Мына даулы жердің иесі де өзгерді. "Сага-Омега" деп аталатын серіктестік басшысы осыдан 10 күн бұрын тұрғындар ақша жинап, тұрғызған қақпаға құлып салдыртып тастаған. Бұл маңның балалары №55-ші мектепте оқиды. Бөбектер сол мектептің қасындағы "Нұрай" бақшасында. Мектеп пен бақшаға бару үшін балалар мен ата-аналар бір жақ қапталында я Ақтөбе-Орск тас жолына шығуы тиіс, не болмаса екінші қапталдағы төменгі Қарғалы тас жолына тартуы керек. Басқа төте жолы жоқ. Жеке тұрғын үйлер бір-біріне еш саңылау қалдырылмастан жапсарласа салынған. Ал Алматы ауданы әкімдігі жағдайдан хабардар болып шықты. Мамандар кикілжің орнына барып, халыққа бір жол тауып қойыпты. Тұрғындардың көрсетуінше ол жол - міне мынау. Бойында кәріз құдықтары бар. Адамның бойымен бірдей шөп өсіп кеткен. Әр жерінде тұрмыстық қалдықтар үйілген. Алматы ауданының әкімдігі мектепке қатынайтын төте жолды тапқан екен, оны адам жүретіндей хәлге де жеткізіп береді деген үміт бар.