Құрдасын пышақтап өлтірген мектеп түлегіне қатысты бүгін сот үкімі шықты. Дүсіповтер әулеті 17-маусым күні балаларынан айырылды. Жексенбінің кешінде сүйікті командасы "Ақтөбенің" "Ордабасымен" ойынын тамашалауға орталық стадионға кеткен Азат үйіне қайта оралмады. Бір ай бұрын бір кеште танысып, сөзге келіп қалса да Бекназдың қолынан өлім құшам деп ойламаса керек. Сол түні Тургенев көшесіндегі кездесу екі бозбаланың бір-біріне шапалақ жұмсауымен тынбады. Бекназ Кеңшілік қалтасындағы пышағын бірнеше мәрте сұққылап, Азат Дүсіповті қансыратып тастап кеткен. Сот Бекназдың бұл әрекетін қасақана жасалған деп таныды. Екі жасөспірімнің кездесуі қылмысқа айналғанына куә болған таныстары жедел жәрдем шақыртып, Азат балалар ауруханасына жеткізілген. Алайда ауыр жарақаттан қайтыс болды. Сот материалдары бойынша оның кеуде қуысына, мойнына, жамбасына, қолына пышақ сұғылған. Қылмыс Тургенев көшесіндегі №98 үйдің қасында болды. Бұл Азат Дүсіпов оқыған №19-орта мектепке жақын жер. Оқиға орнынан қан іздері табылған. Жасалған сараптама қорытындысы Бекназ Кеңшіліктің қылмыс кезінде ақыл-есі дұрыс болғанын, бәрін қасақана жасағанын көрсеткен. Ол қылмысты ішінәра мойындады. Пышақты сол күні жолдан тауып алғанын айтқан. Жасөспірім бүгін сот үкімін сабырлы түрде тыңдады. Ол адам өлтіру бабымен кінәлі деп танылды. Азат Дүсіповтың әкесі сотталушы Бекназ Кеңшіліктің заңды өкілі саналатын әкесінен 10 млн теңге рухани залал, 3 млн теңге материалдық шығын өндіруді талап еткен. Судья моральдық шығын мөлшерін біршама азайтты. Облыстық физика-математикалық мектеп-интернатты үздік тәмамдап, "Алтын белгіден" үміткер болған Бекназ Кеңшілікке қатысты тұтқында ұстау шарасы өзгеріссіз қалды. Бекназ Кеңшіліктің қорғаушылары сот залынан шыға сала үкіммен келіспейтіндерін мәлімдеді. Сот олардың сотталушының әрекетін қылмыстық кодекстің 106-бабының 3-бөлімімен саралау туралы өтінішін негізсіз деп тапқан. Бұл денсаулыққа қасақана зиян келтіру бабы. Бекназ Кеңшіліктің адвокаттары сот үкіміне қарсы апелляциялық шағым түсірмек.