Кешегі мәселе бүгін өз шешімін тапты. "Тәуліктің" кешегі санында №64 мектепке өтетін жолдың бойына темір қақпа орнатып, құлып салып қойғанына наразы ата-аналардың жанайқайын жеткізген болатынбыз. Оқушылардың сабаққа кешігуіне де сол құлып себеп болған. Мектепке өтетін жолдың бойына мына темір құлыпты "Келешек" кондоминиумі салған. Кондоминиум Әлия Молдағұлова даңғылындағы нөмірі 21 және 22 үйлерге жауапты. Магнитті құлып жаңа оқу жылынан бастап салынған. Тұрғындардың айтуынша, тіпті жеке кондоминиум қызметкерлері құлып кілтін сатып алуға да ұсыныс жасапты. Олардың бұл әрекетін тұрғындар заңсыз бизнес деп кеше айқай шығарған болатын. Кешегі шудан кейін бүгін есік ашылған. Астана ауданы әкімдігінің басшылығы қақпаның не үшін орнатылғанын түсіндірді. Қазір оқушылар мектепке екі үй арасымен өтіп кіреді. Алмаз Жақсылықовтың айтуынша, келесі жылдан бастап, мектепке өтетін бөлек жаяу жүргіншілер жолы пайдалануға беріледі. Қазір құрылыс жұмыстары жүріп жатыр. Қақпа есігіндегі құлып күндіз ашық тұратын болды. Таңғы сағат тоғыздан кеші жетіге дейін. №64 мектептің үш ауысымда оқитынын ескерсек, сағат кешкі жетіге дейін сабақтың бәрі аяқталмауы да мүмкін. Көптің пікіріне құлақ асқан Астана ауданының әкімдігі мен "Келешек" кондоминиумінің басшылығы алда бұл мәселенің де байыбына барар деген үміттеміз. "Жақсылық қылсаң бүтін қыл" деген бар.