Облыста 6 мыңнан астам шаруа қожалығы бар. Оның 400- і егін шаруашылығымен айналысса, қалғаны мал шаруашылығында. Мал азығы болатын көпжылдық шөп түрлері 40 мыңға жуық гектар жерге егілуі тиіс. Әзір мал азығына арналған тұқымдар алынбаған. Бағасының түсуін күтіп отыр.
Мал азығы мол болса, түрт түлік те көбейеді. Биыл көктемгі егістік жұмыстарына 1,3 млрд теңге қаржы бөлінді. Дені егіншілік саласына қарастырылған. Ал мал азығы тұқымдарының бағасы қымбат. Шөптің өзі қазір 1 млн.теңге тұрады. Күзге қарай 600 мыңға түседі деген болжам бар. Әзір асықпаймыз, дейді облыстық ауыл шаруашылығы басқармасының басшысы Исатай Еспағанбетов. Тұрақтандыру қорында жергілікті сәбіз, картоп пен жуа жеткілікті. Айналымдағы азық-түліктің жалпы құны 2 млрд.200 мың теңге. Қант та жеткілікті. Ұн тапшылығы да болмауы тиіс. Бұл өнімдерді қолжетімді бағаға әлеуметтік дүкендерден сатып ала аласыздар, дейді Исатай Еспағанбетов. Алайда, қаладағы шағын дүкендер азық-түліктің бағасын негізсіз аспандатып отыр. Мониторингтік топ 2000- ға жуық сауда нүктесін тексерген. Заңбұзушылық бар. Күнбағыс майы, сүт, тіпті бірінші сұрыпты ұнның бағасын 5 есе қымбатқа сатқан. Жағдайды пайдаланып, халықты қанаған алыпсатарларға қатысты әкімшілік хаттама толтырылды. Нан мен ұнның бағасын тұрақтандыру үшін бюджеттен қосымша 1 млрд.теңге бөлінген. Ауыл шаруашылығы басқармасы басшысының айтуынша, әлеуметтік нан бағасы көтерілмейді.Егістік жұмыстарына жұмылдырылатын техника жеткілікті. 1500 трактор дайын тұр. Дизельді отынмен де проблема жоқ. Алайда, ауыл шаруашылығы техникаларына арналған қосалқы бөлшек пен өзге де темір-терсектің бағасы қымбат. Бәрі шетелде өндіріледі. Осы жағынан қиындық тууы мүмкін, дейді сала жетекшісі.