Облысқа жұмыс сапарымен ҚР Парламенті мәжілісінің депутаттары Глеб Щегелский, Сергей Симонов, Дания Еспаевалар келді. Олар өңірде "Нұрлы жол" инфрақұрылымдық дамытудың мемлекеттік бағдарламасы және "Жұмыспен қамту-2020" бағдарламасы аясында атқарылып жатқан істер туралы білмек. Бүгін депутаттар қала сыртындағы оңтүстік айналма жол, Сүт зауыты ауданындағы жол құрылысы барысымен танысты.Депутаттар жол құрылысының жұмыстарымен қатар компанияда еңбек ететін жұмысшылар саны мен олардың жалақысына да жіті назар аударды. Карантин кезінде де жұмысын тоқтатпаған "КТП" жауапкершілігі шектеулі серіктестігі тек сапалы жол салуда ғана емес, тұрғындарды жұмысқа тартуда да көпке үлгі. Мердігер компанияда жол құрылысында 600 адам жұмыс істесе, оның 200-ге жуығы жұмыспен қамту орталығынан келген жұмыссыздар. Жалақылары 150 мың теңгеден жоғары. Депутаттар Оңтүстік айналма жолдағы Елек өзеніне салынған жаңа көпірді, Жиенбаев көшесі мен Курсанттар тас жолына шығатын жолдардағы құрылысты және жөндеу жұмыстары аяқталмаған Тамды көпірлерін аралады. Жолға төселген әр тасты, құйылған асфальттың құрамын көзден таса қылмаған депутаттар мердігер компанияның жұмысына оң баға берді. Айта кетейік, Елек өзенінің үстіне салынған көпір шілде айында пайдалануға берілді. Ұзындығы 197 метрді құрайтын жаңа көпір жүк көліктерінің қатынасы үшін тиімді. Көпір құрылысына барлығы 120 адам және 56 техника бірлігі тартылды. Мамандар көпір тұрғындарға 50 жылға дейін қызмет көрсететінін айтты. Ал құрылыс материалдарының бәрі отандық өнімдер. Жол-құрылыс жұмыстарына геокаркастар мен геоторкөздер пайдаланылып, соңғы үлгідегі технология әдістері қолданылды. Айта кетейік, Оңтүстік айналма жолдың жалпы ұзындығы 13 шақырым. Республикалық бюджеттен қаржыландырылып отырған жоба құны - 7 миллиард теңге. Жол құрылысы толығымен 2021 жылы аяқталады. Қазір жолдың қалған 10 шақырымында құрылыс жұмыстары жалғасуда. Жол құрылысына отандық материалдар пайдаланылып жатыр. Ал мердігер компания «КТП» жауапкершілігі шектеулі серіктестігі үшін ең маңыздысы - жолдың сапалы салынғаны.