Бүгін қалалық төтенше жағдайлар басқармасы қызметкерлері бау-бақша ұжымдарының бірінде рейд өткізді. Өрттің алдын алуға бағытталған акция барысында әлеуметтік жағдайы төмен отбастары тұрып жатқан үйлерге датчиктер орнатып берді. Ақылды құралдар түтіннің, газдың иісі шыққан бойда іске қосылып, дабыл береді. Жыл басталғалы қалада өрт оқиғалары жиілеген. Төтенше жағдайлардың басты себебі тұрғындардың тұрмыстық газды сақтықпен пайдаланбауы, дейді қызметкерлер. Салдарынан газ қазандықтары жарылып, тұрғын үй секторларына айтарлықтай залал келген. Төтенше жағдайлар басқармасының қызметкерлері өрт қауіпсіздігін қамтамасыз ету мақсатында 100-ден астам үйге газ датчиктерін орнатты. Құрылғымен қамтылғандар қатарында көпбалалы отбасылар, зейнеткерлер мен мүмкіндігі шектеулі қала тұрғындары бар. Айта кетейік, қалада газ қазандығының жарылу жағдайы соңғы рет 7 наурызда тіркелді. Қуанышқа орай, Кірпішті елді мекенінде орын алған оқиғадан зардап шеккендер болмады.