Мәселелері толықтай шешілмеген Толстой көшесінің тұрғындары тағы да алаңдаулы. Өткен аптада су таратқыш құбыр жүргізген мердігер мекеме жұмыстарын аяғына жеткізбей кетіп қалғанын айтқан болатынбыз. Бүгін біздің редакциямызға қоңырау шалған тұрғындар жұмыс жүргізіп жатқан мекеме асығатын емес деп шағынды. Толстой көшесі ешқашан асфальтталмаған. Тұрғындары ондаған жылдан бері жол азабын тартып келеді. Көктем, күз, қыста бұл көшемен жүру мүмкін емес. Ми балшық, омбы қарға батып жатады. Көшенің бірнеше жеріне көлемі 3 метрлік су таратқыш құбыр салған мердігер мекеме жұмыстарын аяқсыз қалдырғалы бұл маңның сиқы мүлде қашқан. Әр үйдің алдында тау боп топырақ үйіліп жатыр. Онсызда асфальт немесе қиыршық тасқа жарымаған көшенің түрі одан да жаман күйге түскен. Тұрғындар өз қолдарымен қазған арықтарға лақтырылған құрылыс материалдары жатыр. 60 жылдан бері жөндеу көрмеген көшеге "Ақбұлақ" АҚ тапсырысы бойынша "Аквабилд" ЖШС-і құбыр тартқан. Бірнеше ай бұрын шұңқырлар қазып, қазандықтар орнатылған. Сол уақыттан бері құдықтардың беті ашық тұр. Тұрғындардың қауіпсіздігін ойлаған ешкім болмапты. Тек көше тұрғыны Ольга Дюльгердің айқайымен құдықтардың беті жабылыпты. "Аквобилд" ЖШС директоры Бақтығали Оразаевтың түсіндіруінше, жұмыс әдейі кешеуілдеп тұр. Себебі бірінші жаңбыр жауғаннан кейін ғана топырақ төмен түседі. Қазандықтар толықтай жерге орнатылған соң қазылған жер қалыпқа келтірілмек. Мекеме басшысы ойлы-қырлы жолды қалыпқа келтіріп беруге уәде беріп отыр.