Бүгін таңда Мәртөк ауданында орман алқабы отқа оранды. Ресей Федерациясы аумағында тұтанған жалын біздің облыстың территориясына жылыстаған. Тілсіз жау аз уақыт ішінде 400 шаршы метр жерді алып кетті. Алдын ала ойластырылған осы оқиға желісі шын мәнінде болса, өңірдің құтқарушылары қалай әрекет етер еді? Оны бүгінгі тактикалық оқу-жаттығу барысында пысықтады. Облыстық төтенше жағдайлар департаменті жеке құрамының тактикалық оқу -жаттығу жиыны Мәртөк ауданында, далалық алқапта өтті. Өрт сөндірушілердің алдында 400 шаршы метр аумаққа жайылған өртті ауыздықтау тапсырмасы тұрды. Ал жанған қураған ағаштар. Өрт сөндірушілер қызыл жалыннан аудандағы орман қорын қорғауға бар күштерін салды. Өрт сөндіруді ұйымдастыру тактикасы және авариялық-құтқару жұмыстарын жүргізу бойынша оқу жаттығуға аудандық өрт сөндіру бөлімінің мамандары мен 5 адамнан тұратын өрт сөндіру бекетінің ерікті құрамы жұмылдырылды. Оқу жаттығу жиынына биыл алғаш рет облыстық ТЖД-нің тікұшағы тартылды. Тікұшақпен әуеден барлау жүргізілді. Өрт сөндірушілердің іс-қимылын облыс әкімінің орынбасары Руслан Хамбаров арнайы барып бақылады. Жарты сағатқа созылған сөндіру жұмыстарында дала өртінің күшейіп кетпеу тәсілдері пысықталды. Өрт сөндірушілер су жұмсау, жедел түрде техникамен жер қазып, топырақ шашу тәсілдерін аса шапшаңдықпен көрсетті. Жалпы өңірде дала өрттері Қобда, Қарғалы және Мәртөк аудандарында жиі тіркеледі. Былтырдың өзінде Мәртөкте шөбі шүйгін 29 аумақ жанған. Сондықтан аталған аудандағы екі ауылда биыл өрт сөндіру деполары салынады. Жайсаң мен Родниковка ауылдарындағы бой көтеретін өрт сөндіру бекеттерінде 7 маманнан жұмыс істемек. Облыстың 300 мың шақырым жері орманды алқаптар санатына жатады. Былтыр аудандар мен қаланың өрт сөндіру бекеттеріне жаңадан 21 техника сатып алынған. Биыл Қобда ауданы мен Қандыағаш, Ақтөбе қалаларына өрт сөндіру деполары салынады.