Бұл балалар лагерьдің биылғы маусымын ашып берді. Алғашқы лекпен тынығатын 300-дей баланы тәрбиеші, тәлімгерлер топ-топқа бөліп алған. Лагерьде ескі әдетпен әрине әр топтың өз атауы, ұраны, таңбасы болады. Лагерь қағидасы бойынша әр оқушы өз тобына адал. Мәдени, зияткерлік, спорттық шараларға белсене қатысып, тобының жеңіске жетуіне үлесін қосуы керек. Жазғы лагерьдің ашылу салтанатына "СНПС-Ақтөбемұнайгаз" АҚ-ның басшылығы, кәсіподақ ұйымының өкілдері де қатысты. Осы лагерь тиесілі компанияның бас директоры Ван Цзюньжэнь балаларға демалыстарының сәтті, қызықты өтуіне тілектестігін білдірді.
"Мұнайшы" лагерінде "СНПС-Ақтөбемұнайгаз" АҚ қызметкерлерінің, жұмысшыларының мектеп жасындағы балалары демалады. Жолдама ақысының 70 пайызын жұмыс беруші, 20 пайызын кәсіподақ өтейді. Ата-ана жолдама ақысының 10 пайызын ғана төлейді. Сондай-ақ, лагерьде өңірдегі мұнай кеніштеріне жақын орналасқан ауылдардың балалары да тынығады. Әлеуметтік жағдайы төмен, көп балалы отбасы балаларына да әр маусым сайын тегін орындар қарастырылған. Жұмысы кеше басталған лагерь тамыздың 20-сына дейін ашық. Осы аралықта 2100 оқушы демалыспен қамтылмақ. Олар 7 ауысыммен қабылданады. 10 күндік әр ауысымда 300 баладан тынығады.