Облыстық мамандандырылған қылмыстық істер жөніндегі ауданаралық соты орналасқан Шәмші Қалдыаяқов көшесі таңмен жабылып, ғимаратты тәртіп сақшылары бақылауға алды. Сот отырысын журналистер мен сотталушылардың туыстары экраннан бақылады. Судья Ахметқали Молдағалиев 26 адамның аты-жөні, отбасы, туған жері мен тұрғылықты мекен-жайы, бұрын сотталған, сотталмағанын анықтады. 26 адамның 18-і қазір қамауда. Қалған 8-і қолхат арқылы босатылған. Айыпталушылардың арасында бұрын сотталғандар да бар. Тіпті, арасындағы 30 жастағы Біржан Аманқұлов абақтыда отырған жерінен қылмыстық жауапкершілікке тартылуда. 2013 жылы 10 жылға сотталған ол Ақтөбе облысы Темір ауданында туған. Орта білімді, үйленбеген. «Ағайынды төртеу» деген лақап атпен танымал ұйымдасқан қылмыстық топтың басшысы Еркін Ізбасар сот залында өзінің денсаулығына шағымданды. 1-топ мүгедегі Еркін Ізбасар жеке басына қатысты мәліметтерден шатасты. Осыдан кейін басым ауырып тұр. Сұрақтарға жауап бере алмаймын, деді ол. Бірақ судья, мән бермеді. Былтыр желтоқсанда қамалған қылмыс әлемінің серкесінің сөзінше, бір жылға жуық уақыттан бері әлі тергелмеген. Оқиғаға қатысты күдіктілердің арасында Ақтөбе облысының ішкі істер департаменті бастығының 1-орынбасары болған 55 жастағы Рахат Ақанов та бар. 5 жыл өңірдің бас полицейінің орынбасары қызметін атқарған ол қазір Астана қаласында тұрады. Рахат Ақанов былтыр 18 қаңтарда ұсталып, уақытша тергеу изоляторына қамалды. Сотталушыларға ҚР Қылмыстық кодексінің «Мұнайдың және мұнай өнiмдерiнің шығарылу заңдылығын растайтын құжаттарсыз оларды тасымалдау, иемдену, өткiзу, сақтау, сондай-ақ мұнайды қайта өңдеу», «Ұйымдасқан топ, қылмыстық ұйым құру және оларға басшылық ету, сол сияқты оларға қатысу» баптары бойынша айып тағылды. Сотталушылардың мүддесін 40-тан астам адам қорғайды. Қорғаушы ретінде адвокаттармен бірге жауапқа тартылғандардың туыстары мен заңды өкілдері де бар. Сотталушылардың дені 2016 жылдың қараша, желтоқсан айларында ұсталған. Биыл қаңтардан маусым айына дейін қамауға алынғандар да бар. Ақтөбе, Оңтүстік Қазақстан, Батыс Қазақстан, Маңғыстау облыстарының тумалары. Барлығының кәмелеттік жасқа толмаған балалары бар. Алдын ала сот тыңдауы кезінде Еркін Ізбасардың қорғаушысы судьядан оны үйқамаққа шығаруды сұрады. Бір жыл бұрын қамауға алынған 1-топ мүгедегі өздігінен жуына да алмайды. Таза ауа жұтпаған деп отыр анасы.