Мүмкіндігі шектеулі жандар автобустарда тегін жүргісі келеді. Өйткені, спортпен шұғылданатын мүгедектердің жүрісі көп. Күніне кем дегенде төрт рет қоғамдық көлікпен қатынайды. Бұл туралы бүгін дене мүмкіндігі шектеулі адамдарға арналған спорт клубының есеп беру жиынында клуб директоры Наталья Сокольская айтты. Облыста 800-ден астам мүгедек спортпен тұрақты айналысады. Дене мүмкіндігі шектеулі адамдарға арналған спорт клубының құрылғанына биыл үш жыл. Бастапқы уақытта клуб мүшелерін жинау, бапкерлер құрамын жасақтау секілді шаруалар тындырылса, өткен жылы клуб басшысы мүгедектерге арналған спорт орталығын ашу мәселесін қолға алды. Сөйтіп, әкімдік "Нұр Ақтөбе" ауданынан 2 гектар жер беріп, орталықтың жобалық-сметалық құжаттарын әзірлеуге 30 миллион теңге бөлді. Жоба дайын болған соң, құны 600 миллион теңгенің ғимараты салынады. Ендігі мәселе - спортшы мүгедектердің автобуста жүріп-тұруын ұйымдастыру. Мүгедек спортшылар "дене шынықтыру" мамандығы бойынша университетте білімдерін жалғастыра алмай жүр. Өйткені, оқуға түсу үшін талапкердің дені сау болуы керек. Спорт клубының басшылығы қаладағы жоғары оқу орындарының бірінде "дене шынықтыруға бейімдеу" мамандығы ашылса деген ұсынысын білдірді. Қазір есту қабілеті зақымданған үш адам жергілікті колледждің спорт бөлімінде, көру қабілеті нашар бір адам Алматы Ұлттық академиясында "жеңіл атлетика" мамандығы бойынша оқып жүр.