Біз, қазақ деген, мал баққан елміз, ешкімге соқтықпай, жай жатқан елміз. Елімізден кұт-береке қашпасын деп, жеріміздің шетін жау баспасын деп, найзаға үкі таққан елміз! Досымызды сақтай білген елміз, дәмі, тұзын ақтай білген елміз. Мейірім мен рақым тіленгенді бауырымызға басу қазақы қанымызға сіңген қасиет. Қазақстан халқын тарихи тағдыр қосқан. Кең байтақ елімізді мекен еткен 130-дан астам ұлт пен ұлыс өкілінің қазақ халқына алғысы шексіз.Алаңда өткен мерекелік концертке облыс, қала басшылары да қатысты. Аймақ әкімі Оңдасын Оразалин тұрғындарға мерекеге бір үйдің баласындай атсалысып жатқандары үшін алғыс білдірді. Өңіріміздің дамып-өркендеуіне үлес қосып жатқан 18 этно-мәдени бірлестік өкілдеріне құрмет грамоталарын табыстады. Өңір басшысы қазақ елінің болашағы оның біртұтастығында екенін атап өтті. Біздің елімізде әр ұлт өзінің тілі, ділі, дінін, мәдениеті мен салт-дәсүрін сақтауға құқылы. Ол үшін арнайы Қазақстан халықтары Ассамблеясы институты жұмыс жасайды. Ассамблея жанына шоғырланған барлық бірлестіктерге бірдей жағдай жасалған. Мерекені әр ұлт өкілдерінің дайындаған концерттік бағдарламалары қыздыра түсті. 18 ұлттық мәдени орталық өнерпаздары түрлі тілдерде ән салып, би билеп жиылған халықтың көңілін көтерді. Біздің өңірімізде 100-ге тарта ұлт пен ұлыстың өкілі тұрып жатыр.