Мұғалжар ауданында биыл 21 нысанға қайта жаңғырту, күрделі және орташа жөндеу жүргізілмек
Аймақ басшысы Асхат Шахаров демалыс күні Мұғалжар ауданына іс сапармен барды. Аудандағы маңызды мәселенің бірі - жол сапасы. Биыл мұнда жолдардың құрылысы, қайта жаңғырту, күрделі және орташа жөндеу бойынша 21 нысанда жұмыс жүргізілуде. Жалпы аудандағы автомобиль жолдарының ұзындығы - 680 шақырым. Оның 210 шақырымы – республикалық, 64 шақырымы – облыстық, 406 шақырымы – аудандық маңыздағы жолдар. Биыл 55 шақырым жолда жұмыс жүріп жатыр. Солардың бірі - «Қандыағаш–Ембі–Шалқар–Ырғыз» автомобиль жолы. 1960–1970 жылдары салынған. 2023–2024 жылдары 45 шақырымы жөнделсе, биыл тағы 110 шақырымы пайдалануға беріледі, дейді Асхат Шахаров. Биыл өңірде көлік инфрақұрылымын дамытуға 60 млрд теңге бөлінді. 156 жоба қолға алынып, 464 шақырым жол жөнделіп, салынады. Оның 36-сы – ауданаралық жолдарға, 120-сы – ауыл және қала көшелеріне тиесілі. Сондай-ақ, «Ақтөбе–Қарабұтақ–Ұлғайсын» тасжолын және Ізімбет–Біршоғыр–Қотыртас бағытындағы жолдарды жаңғырту жұмыстары басталды.Мұғалжар ауданы әкімінің орынбасары Жомарт Бақыткелдінің айтуынша, кейбір учаскелерде проблемалық аймақтар да жоқ емес. Оларды қалпына келтіруге қажетті материалдар мен техника жеткілікті. 21 нысанның жұмысы аяқталғаннан кейін аудан бойынша асфальтталған жолдардың үлесі 77 пайызға жетеді. Қандыағаш қаласында да жол мәселелері шешіліп жатыр. Тас жолдар жөнделіп, жаңалары да салынып жатыр. Облыс әкімі құрылыс барысын бағамдап, мердігер ұйым өкілдерімен тілдесті. Асхат Шахаров жұмыстардың сапасы мен мерзімінің сақталуына айырықша назар аудару қажеттігін айтты.Өңір басшысы мұнайлы өлкенің әлеуметтік-экономикалық даму барысын да тыңдады. Аудан әкімі Дархан Ермағанбетовтің сөзінше, ауданда бәрі жақсы. Өнеркәсіп өндірісінің көлемі 230 млрд теңгеден асқан. Былтырмен салыстырғанда 0,8%-ке өсім бар. Ауыл шаруашылығы оң динамикасын сақтап қалған. 9,6 млрд теңге. Жыл басынан бері ауданда 9,6 мың шаршы метр тұрғын үй пайдалануға берілді. Орындалған құрылыс жұмыстарының көлемі 8,4 млрд теңге. Сауда-саттықта да өсім бар: бөлшек сауда айналымы 55%-ке, көтерме сауда айналымы 8 есе өскен.Количество показов: 12
Дата создания: 15.07.2025 07:36:04
