Халықаралық әуежай неге су тегін бағаға сатылуы керек? Бүгін бұл мәселе Парламент қабырғасында талқыланды. Халық қалаулылары Үкіметке мемлекет меншігіндегі ірі нысанның бағасын көтеру керек деген ұсыныс жолдады. Жергілікті атқарушы билік өкілдері де бүгін осы мәселе жөнінде мәлімдеме жасады. Әлия Молдағұлованың халықаралық әуежайының құны белгілі болды. Бағаны сараптаушы алматылық компания стратегиялық маңызға ие мемлекеттік нысанды 7 млрд 300 млн теңгеге бағалаған. Жарияланған тендер де аяқталуға таяу. Бүгін парламент депутаты Андрей Линник те осы мәселені көтеріп, Үкіметке сауал жолдады. Депутат халықаралық әуежай өте арзанға бағаланып отыр, мұнда бір шикілік бар дегенді меңзеді. Ертең тендер қортындысы шығатын күн. Әуежай ғиамараты толық халықаралық деңгейде жасақталған. Батыс Еуропа мен Оңтүстік- Шығыс Азияны жалғастырып келген , әуедегі бірегей ірі аэронавигациялық көпір болып саналатын нысанның нақты бағасы мұнан бірнеше есе қымбат болуы тиіс дейді халық қалаулысы. Ал, жергілікті билік өкілдері биыл облыс бойынша ең ірі 12 мемлекеттік нысан саудаға шығарылатынын айтады. Солардың бірі осы Әлия Молдағұлованың халықаралық әуежайы. 2014 жылы "Самұрық-Қазына" әл-ауқат қорынан коммуналдық мекеме ретінде мемлекет меншігіне өткен Ақтөбе халықаралық әуежайы жылына бюджетке 300-ден 800 млн теңгеге дейін салық төлеп келген. Демек, нысанның жылдық табысы да қомақты. Тіпті , соңғы жылдары ішкі рейстердің саны біршама көбейген. Электронды түрде мемлекеттік сатып алу заңы аясында саудаға қойылған әуежайдың жаңа қожайыны да таяу күндері белгілі болады.