Әлем чемпионы атанған Қазыбек Қалмағамбетовке көліктің кілті сыйланды
Қалаға грек-рим күресінен U20 санаты бойынша әлем чемпионы Қазыбек Қалмағамбетов оралды. Братиславада өткен додада 67 келі салмақта топ жарған жас балуанды облыс әкімі қабылдап, жеңісімен құттықтады. Әлем чемпионына көлік кілті табысталды.Қалаға грек-рим күресінен U20 санаты бойынша әлем чемпионы Қазыбек Қалмағамбетов оралды. Словакияның Братислава қаласында өткен әлем чемпионатында 67 келі салмақта алтын медаль иеленген жас балуанды туған жерінде ата-анасы, жақындары мен жүздеген жерлесі зор қошеметпен қарсы алды. Қазыбектің бұл жеңісі - облыстың грек-рим күресі тарихындағы тарихи жетістік. Себебі ол өңірден аталған санат бойынша әлем чемпионы атанған алғашқы спортшы. Жас балуан грек-рим күресімен 2015 жылдан бері айналысады. Ол 2021 жылы U15 Қазақстан чемпионатында қола жүлдеге ие болса, 2023 жылы U17 санатында ел чемпионы атанып, Азия чемпионатының күміс медалін жеңіп алған. Спортшының айтуынша, бұл жеңістің артында бірнеше жылдық дайындық пен бапкерлердің еңбегі тұр. Әлем чемпионын облыс әкімі Асхат Шахаров та қабылдап, жеңісімен құттықтады. Өңір басшысы жас спортшының жетістігі Ақтөбе спортының ғана емес, бүкіл елдің абыройын асқақтатқанын атап өтті. Кездесу барысында Қазыбек Қалмағамбетовке, оның анасы Қызжібек Құрбанәліқызына және бапкерлеріне «Алғыс хат» табысталды. Ал спортшының алғашқы жаттықтырушысы Мұхамеджан Зарлықов «Облысқа сіңірген еңбегі үшін» төсбелгісімен марапатталды. Әлем чемпионын күтіп алу шарасында спортшыға облыс әкімі Асхат Шахаровтың ұсынысымен автокөліктің кілті табысталды. Осылайша, 20 жастағы Қазыбек Қалмағамбетов Ақтөбе спортының тарихына жаңа есім болып еніп, грек-рим күресінен өңірдің алғашқы әлем чемпионы атанды.
Количество показов: 10
Дата создания: 25.08.2026 08:34:53
