Қара жексенбіде қарулы қақтығыстың ортасында қалып, зардап шеккендерді бірінші болып қабылдаған облыстық жедел жәрдем ауруханасы. Лаңкестерге қарсы операция өткен маусымның 5-і мен 13-і аралығында жедел жәрдем ауруханасына барлығы 34 адам жеткізілген. Еламан Жанділдаев 5-маусым күнгі басынан өткергендерін қайтіп еске алғысы жоқ. Дәрігерлердің жоғары дәрежелі кәсіби біліктілігі арқасында №6655 әскери бөлімде келісім шарт бойынша қызмет етіп жатқан жауынгер кеше 21-ші туған күнін тойлады. Атыс кезінде оқ сарбаздың өкпесіне қадалған болатын. Отадан кейін сарбаздың жағдайы оңалған. Бірақ, деннің саулығы мен жанның саулығын қалыпқа келтіру үшін әлі біраз уақыт керек болады. Әсіресе психологиялық тұрғыдан қолдау қажет. Еламаннан бөлек облыстық жедел жәрдем ауруханасында лаңкестікке қарсы операция кезінде жараланған тағы 3 адам емделіп жатыр. Олар жол полициясы, "Күзет" қызметкері мен тағы бір қала тұрғыны. Бүгін №6655 әскери бөлімі мен ішкі істер департаментінің ұжымы облыстық жедел жәрдем ауруханасы қызметкерлерін кәсіби мейрамдарымен құттықтап келді. Күштік құрылымдар қалада жүргізілген лаңкестікке қарсы операция кезінде жараланған жауынгерлер мен тәртіп сақшыларының өміріне араша болғандарға шын көңілдерімен рахмет айтты. Естелік сыйлықтар табыс етті.