Бүгін қалалық №2 сотта терроризмді насихаттаған азаматқа үкім шықты. 33 жастағы Алмас Әбдіраев Хромтау қаласының тұрғыны. 2002-жылы істі болып, шартты түрде 2 жылға сотталған. Арақ ішіп, маскүнемдікке салынып кеткесін, анасы оны намаз оқуға бағыттайды. Іс материалында оның үнемі әлеуметтік желіде отыратындығы көрсетілген. Ғаламтор арқылы, қала тұрғындарына теріс ілімді насихаттап, лаңкестік жасауға шақырған. Алмас Әбдіраев осы жылдың наурыз айында, Ресей федерациясы аумағында жарылыс ұйымдастырмақ болған. Бұл қадамға оны Ресейдің Сириядағы антитеррорлық операциясы итермелепті. Әбдіраев "В-Контакте" әлеуметтік желісі арқылы үгіт-насихат жұмыстарын жүргізген. Қалалық №2 сотының судьясы Алдан Темірғали оны ҚР қылмыстық кодексінің 256-бабы, 1-бөлігі бойынша кінәлі деп таныды. Сот Әбдіраевты 4 жыл 8 айға бас бостандығынан айырып, мүлкін тәркілеу үкімін шығарды. Жазасын жалпы тәртіптегі түзету колониясында өтейді. Сот шешімі заңды күшіне енген жоқ.