Қалалық қылмыстық істер жөніндегі №2 сотта бүгін судья Зинаида Шмирова ҚР ҚК-нің лаңкестікті насихаттау және әлеуметтiк, ұлттық, рулық, нәсiлдiк,тектік-топтық немесе дiни алауыздықты қоздыру баптары бойынша шалқарлық 3 жігітке үкім оқыды. Оларға мүліктерін тәркілеп, 6 жылдан 8 жылға дейін бас бостандықтарынан айыру жазасы тағайындалды. Тергеу барысында анықталғандай, 38 жастағы Төребай Мәжитов ислам дінінің радикалды бағытын ұстанушы деп танылған. Абухолид Абдумаджид атымен тіркелген ол былтыр тамыз, желтоқсан айларында "Вконтакте" әлеуметтік желісіндегі жеке парақшасында достарымен "Муджахедтің әйеліне хаты", "Шахидтің 20 құндылығы" секілді орыс тіліндегі мәтіндермен бөліскен. Кейін "Уақыт келді ахи", "Қанша жүре береміз ахи" деген мазмұндағы үндеу хат жазып, өз-өзін жарып, шахид жасау туралы бейнероликтер жіберген. Бұдан кейін ол шалқарлық Ерғожа Аманғожин, Мейрамбек Тұрғанбаевтармен ұялы телефондағы ватсап желісі арқылы "Аллаға деген уағыз" тобында "Шахада немесе өз-өзін өлтіру", "Қазіргі заманның мүрджиттері" секілді мәтіндер жіберіп, хабарлама алмасып отырған. Мейрамбек Тұрғанбаев тек бір бап бойынша сотталса, қалған екеуі ҚР ҚК 256 баптың екінші тармағы, 174 баптың 1 тармағы бойынша 8 жылға бас бостандықтарынан айрылды. Жазаларын жалпы тәртіптегі колонияда өтейді. Мүліктері тәркіленеді. Үкім заңды күшіне енген жоқ. Үкіммен келіспеген жағдайда тараптар апелляциялық арыз бере алады.