Коронавирус жұқтырған ақтөбелік оған айып тағылып, сот оны кінәлі деп танитын болса және ол инфекция жұқтырып үлгерген адамдардың бірі көз жұматын болса, 10 жылға дейін бас бостандығынан айрылуы мүмкін. Эпидемиологиялық зерттеу кезінде ер адам өзінің ауру екенін біле тұра қасақана өзімен байланыста болған адамдарға қатысты мәліметтерді жасырып қалған. Салдарынан онымен тығыз байланыста болған тағы екі адамнан кеше вирус табылды. Соңғы екеуінің бірі Ағайынды Жұбановтар көшесіндегі "Анвар" супермаркетіне жиі барған. Дүкен карантинге жабылады. Ақтөбеде бүгінгі таңда қауіпті індеттен 13 адам емделіп жатыр. Қалада карантин талаптары күшінде. Облыста коронавирус жұқтырғандар саны 13-ке жетті. Соңғы екі адам тізімді кеше және бүгін толтырып отыр. Ерлі-зайыптылардың бірінен алынған сынама қорытындысы кеше кешкі тоғыздар шамасында белгілі болды. Екіншісінің сынама нәтижесі бүгін таңда шығарылған. Естеріңізде болса, 2-ші сәуірде облыста коронавирус жұқтырудың сегізінші жағдайы тіркеліп еді. Ақтөбе тұрғыны іссапармен Алматы, Нұр-Сұлтан қалаларында болған. Вирусты қалаға сол жақтардан жұқтырып келген. Бірақ бұдан бейхабар ер адам үйіне келіп, инфекцияны әйеліне және баласына жұқтырады. Тағы бір туысының үйіне барып, онда да ерлі-зайыпты екі адамға жұқтырған болып шықты. Кеше және бүгін анықталып отырған науқастар осы соңғы екеуі.Бір адамның жауапсыздығынан бірнеше адамның денсаулығына, тіпті өміріне қауіп төнді. Мәселен, іссапардан оралған соң ақтөбелік өзін жайсыз сезініп, "Әйгерім" клиникасына барған. Салдарынан клиника екі аптаға карантинге жабылды. Ондағы медициналық қызметкерлер әлі үйлерінде оқшауланып отыр. Дәрігерлердің бақылауында. Сондай-ақ, бұл адам отбасымен тұрған үй карантинге жабылды. Көршілері оқшауланды. Енді қазір мына соңғы анықталған науқастарға қатысты эпидемиологиялық тергеу жүріп жатыр. Әзір белгілісі, ағайынды Жұбановтар көшесіндегі "Анвар" супармеркеті карантинге жабылып, оның барлық жұмысшысы үй карантиніне алынды. Өйткені соңғы екеудің бірі осы дүкенге жиі барған. Пәтерлері орналасқан подъезд карантинге жабылды. Ондағы 28 тұрғын медициналық бақылауға алынды. Тығыз байланыста болған алты адам ауруханаға жатқызылды. Осы жағдайға қатысты облыстық тауарлар мен көрсетілетін қызметтер сапасы мен қауіпсіздігін бақылау департаменті тарапынан полицияға материал әзірленіп жатыр. Күдіктінің кінәсі дәлелденсе, әкімшілік қамаудан бастап екі жылға дейін бас бостандығынан айыру жазасы қолданылуы мүмкін. Ал оның байланыста болған адамдарды жасыруы салдарынан вирус жұқтырып алғандар арасында өлім тіркелетін болса, 5 жылдан 10 жылға дейін түрмеге қамалуы мүмкін. Бұл оқиға эпидемия кезінде науқаспен байланыста болған адамды жасырып қалудың қаншалықты күрделі мәселе екенін көрсетіп отыр. Тұрғындарға мұндай жағдайға жол бермеу қатаң ескертіледі.