"КНЛК" ЖШС-нің бір топ жұмысшысы наразылық білдіруде. Айтуларынша, компания басшылығы оларды еш себепсіз жұмыстан шығарған. Карантинге байланысты онсыз да ақысыз демалысқа жіберілген азаматтар, енді отбасымызды қалай асыраймыз, деп алаңдаулы. Себепсіз жұмыстан шығып қалған 9 жұмысшының алтыдан он жылға дейін еңбек өтілі бар. Бұрын соңды ұсақ-түйек ескерту алғанымыз болмаса, аса бір үлкен тәртіпбұзушылыққа жол берген жоқпыз, дейді олар. Дегенмен, еш ескертусіз, түсініктемесіз жұмыстан шығып қалған. Вахталық әдіспен қызмет ететін жұмысшылар карантинге байланысты 6 айдан бері үйде екендерін айтады. Осы уақыт аралығында тек 42500 теңге ғана алып отырған. Енді ол да жоқ. Бар жазығымыз басшылықтан айлық жалақыны көтеруді сұрап, бірнеше рет бас сұққанбыз, дейді жұмысшылар. Сөздеріне сенсек, олар 11 сағат жұмыс істеп еңбекақыны тек 8 сағатқа ғана алып отырған. Оған қоса түнгі ауысымға мүлдем қосымша ақы төленбеген. Радиациялық зияны тағы бар. Осыларды ескеріп, әуелі баста 30 шақты жұмысшы қол қойып басшылыққа арыз жазған. Алайда, басшылықтың қысымына төзбегендер біртіндеп арыздарынан бас тарта бастаған. Істі аяғына жеткіземін, деп шырылдағандары жұмыстан шығып қалды. Онда да жұмысшыларға алдын ала ескертілмеген. Тек мессенджер арқылы келісімшарттың тоқтағаны туралы бұйрықтың суретін жолдап қана қойған. Кеңсенің алдына бірнеше рет бардық, алайда ешкім сөйлесіп, мән-жайды түсіндіруге шықпайды, дейді жұмысшылар. Облыстық еңбек инспекциясына бұл мәселе бойынша ешқандай арыз-шағым түспеген. Жұмысшылар егер жүгінсе, мекемеде тексеру жүргізіледі. Басшылықтың көңілінен шықпай қалып, жұмыстарынан айырылған тұрғындар енді еңбек инспекциясына жүгінеді. Егер ол жерден де тиісті жауап ала алмасақ, сотқа баруға да дайынбыз дейді олар.