Хромтау ауданындағы кен орнында болған жарылыстан көз жұмған жұмысшылардың отбастарына көмек көрсетіледі. 30-шы желтоқсан күні болған апаттан төрт жұмысшы көз жұмып, біреуі аман қалды. Қайтыс болған азаматтардың әрбіреуінің отбасына 20 млн теңгеден беріледі. Одан бөлек пәтер берілуі мүмкін. Көктау кентінен 30 шақырым жерде орналасқан «Ақтөбе мыс компаниясы» ЖШС-нің «Весенняя Аралчинская» шахтасында әлі жан-жақты тексеру жұмыстары жүріп жатыр.Комиссия құрамында құзырлы органдардың өкілдері бар. Тексеру жұмыстары әлі екі апта жүреді. Алдына-ала болжам бойынша, 4 жұмысшы улы газ иісіне тұншыққан болуы мүмкін. Ал бесінші адам газға қарсы бетперде кигендіктен аман қалған. Бұл қорғаныш құралының барлық жұмысшыларға бірдей таратылғандығы қазір анықталу үстінде. Жарылыс болған кен орнының жұмысы уақытша тоқтатылған. Жалпы «Ақтөбе мыс компаниясы» ЖШС-де 1513 адам жұмыс істейді.