Шаһарда бүгін "Халық және бизнес қауіпсіздігі" форумы басталды. Облыстық төтенше жағдайлар департаментінің ұйымдастыруымен өтіп жатқан шараға төтенше жағдайлар комитетінен, республикалық "Қазгидромет" мекемесінен өкілдер қатысты. Ресейден де қонақтар келген. 2017 жылы елде болған су тасқынының салдары мен себептерін айтып, болашақта мұндай апаттардың алдын алу шаралары талқыланды. Жаңа бағдарламалар ұсынылды. Республикалық "Қазгидромет" мекемесінің сандық технологиялары көрсетілді. 2017 жылы аймақта 71 бау-бақша ұжымы мен 900-ден астам үй суға кеткен. Өңірде көліктегі және тұрмыстағы өрттің саны артып кеткен. Оның да алдын алу мәселелері талқыланды. Қазір өрттің көпшілігі тұрғын үйлерде болып жатыр. Баспаналардың 33 пайызы 1970-ші жылдары салынған. Өңірде болған өрттің 60 пайызы осы үйлерден шыққан. Зауыт, кәсіпорындарда жұмыс жасайтын азаматтарды қорғау мәселелері де сөз болды. Форум аясында төтенше жағдай кезінде халықты қорғайтын, апат туралы алдын ала хабарлайтын, құтқару техникалары мен құралдар қойылған көрме өтті. Солардың бірі - ауаға химиялық улы заттар тараған кезде қорғанатын бетперде. Арнайы сүзгісі бар бетперделер алда Алматыда шығарылатын болады. Зауыт қазір салынып жатыр. Балалар, ересектерге арналған түрлері бар. Көрмеге қойылған төтенше жағдайды болдырмау және жобаға арналған жаңа технологиялар түстен кейін арнайы полигонда тексерілді. "Халық және бизнес қауіпсіздігі" форумы ертең де жалғасады.