"Ақтөбе халықаралық әуежайы" АҚ-ы қыркүйек айынан бастап сырт мемлекеттермен әуе қатынасын қалыпқа келтіреді. Яғни, 2-ші қыркүйектен бастап Ақтөбе-Анталья, Ақтөбе-Пекин, Ақтөбе- Гуанчжоу бағыттарында тікелей рейстер қатынай бастайды. Бұл туралы "Ақтөбе халықаралық әуежайы" АҚ басқарма төрағасы Дастан Малиев хабарлады. Мекеме басшысы бүгін өткен баспасөз турында журналистерге карантин кезінде жүргізіліп жатқан жұмыстар туралы жан-жақты ақпарат берді. Әуежайда қазір толық санитарлық талапты сақтау мақсатында 29 арнайы санитайзер құрылғылары орнатылған. Ішке енгеннен бастап ұшу алаңына өткенше бірнеше аппараттар маңына аялдауға тура келеді. Мекеме басшысы келушілердің мазасын алмау үшін қысқа мерзімде қызметтерді жеделдету жағы қарастырылып жатқанын жеткізді. Бұрынғыдай касса маңында ұзын-сонар кезек жоқ. Билеттер онлайн сатылымда. Ана мен бала денсаулығына күтім көрсететін арнайы бөлме жасақталған. Аталған бөлмеде ұшақ кешіккен жағдайда баласы бар аналар демалуына болады. Әуежайда қыркүйек айынан бастап халықаралық әуе қатынастары жандана бастайды. 2-ші қыркүйектен Түркия мен Қытай мемлекеттеріне жолаушы тасымалы жүзеге аса бастайды. Яғни, демалыс сапарынан бөлек, сауда-саттық, тауар айналымы жанданады. Сыртқы рейстермен бірге, ішкі тасымал да қалыпқа келтірілмек. Ақтөбе-Нұрсұлтан, Ақтөбе-Алматы бағыттарына айына 19 рейстен ұшып жатыр. Ұшу карантин режимі кезінде керісінше көбейген. Мемлекеттің қарауына өткен мекемеде әлі де өзгерістер енгізілуі мүмкін. Өзара қаржылық мәселеге байланысты келісім үзілген "FlyArystan" әуе компаниясымен бірге қайта шарт жасалып, ақтөбеліктер аталған компанияның лайнерлерімен ұшуға мүмкіндік алмақ. Әуежай ұшу алаңдарының қысқы мерзімге дайындығын күз мезгілі түскеннен бастап пысықтай бастайды.