Тұрғылықты жері бойынша уақытша тіркелу үшін енді халыққа қызмет көрсету орталығына барудың қажеті жоқ. Бұл қызмет "е-гов" электронды үкімет порталында да жүргізіледі. Тіркеуге байланысты ел бойынша дүрбелең туып, кезекте тұрған екі адам қайтыс болғаны белгілі. Бұл оқиғалардан кейін "Азаматтарға арналған үкімет" мемлекеттік корпорациясы тіркеудің онлайн түрін іске қосты. Ол үшін үй иесі мен онда тіркелуге ниет білдірген азаматтың электронды цифрлық қолтаңбасы және төлем карточкасында мемлекеттік баж салығын өтеуге жететін 226 теңгесі болуы керек. Тіркеу рәсімі е-Gov порталында жасалады. Ақтөбеліктердің көбі кеше іске қосылған тұрғылықты жері бойынша онлайн тіркелу қызметі туралы білмейді. Тіркелу үшін әлі де халыққа қызмет көрсету орталығына келіп жатыр. Олардың құжаттарын әдеттегідей миграция мамандары қабылдап отыр. Компьютерді түсінбейтін жандар халыққа қызмет көрсету орталығының мамандарына жүгіне алады. Бірақ, Тургенев көшесіндегі ғимаратта бүгін онлайн тіркелу жүйесі жұмыс істемеді. Мамандар техникалық ақаудың себептерін кешеден бері анықтай алмай жатыр.