Халыққа қызмет көрсету орталығы медициналық жәрдем береді. Алматыдағы төтенше жағдайдан соң облыстық денсаулық сақтау басқармасы мен орталық бірлесіп, арнайы бұрыш ашып қойған. 7-ші қаңтардан бастап уақытша тіркеу міндеттелген соң халыққа қызмет көрсету орталықтарының іші ығы-жығы болып кетті. Олардың бәрі уақытша тіркеуге ғана емес, тұрақты тіркелуге де келіп жатыр. Мәселен, қала бойынша 7 мыңнан астам адам тіркеуге алынды. Оның 4600-ден астамы тұрақты тіркелді, өзгесі уақытша. Таңғы 8-ден кешкі 8-ге дейін қызмет көрсететін орталықта түс ауа адам қарасы көп болған жоқ. Бәрі өз кезегімен жылжып жатыр. Ал орталық жұмыс уақыты кезінде қызметкерлерді алаңдатпай, бір ғана сенімхатпен барлық мәселенің шешілетінін хабарлады. Халыққа қызмет көрсету орталығы келушілердің көңілінен шығу үшін бар жағдайды жасап жатыр. Кіреберісте еріктілер жүр. Оқу орындарының студенттері көзі нашар көретін, қалам ұстауы қиын жандарға көмектеседі, түбіртек толтырып береді. Ал шаршап, шөлдегендері тегін шай іше алады. Денсаулығы сыр бергендер қос дәрігердің жіті бақылауында. Дәрігерлер қажетті дәрі-дәрмекпен қамтамасыз етілген. Облыстық денсаулық сақтау басқармасы мен халыққа қызмет көрсету орталығы әр күн сайын екі дәрігерді кезекшілікке қою керек деп шешті. Ұйымдасқан жұмыс нәтижесінде Ақтөбедегі уақытша тіркеу жұмысы әзірге сәтті өтіп жатыр. Ал Алматыда бүгін тағы бір адам халыққа қызмет көрсету орталығында көз жұмды. 52 жастағы ер адам. Жәдел жәрдем көлігі келгенімен, азаматтың өмірін сақтау мүмкін болмады. Айта кетейік, халыққа қызмет көрсету орталықтарында жүкті әйелдер мен мүгедектерге арнайы терезе қызмет көрсетеді. Ал 1-ші және 2-ші топтағы мүгедектер қызметкерлерді үйлеріне шақыра алады.