Кереев көшесіндегі шағын бақ қырым қарағайларымен толықты
Шаһарды көгалдандыру жұмыстары Ақтөбе теміржол вокзалы маңындағы Кереев көшесінде де жүрді. Қала әкімі бастаған топ бұл шағын бақ бойына да қырым қарағайларын отырғызды. Көше тұрғындары да ағаш егуге көмек қолдарын созды. Кереев көшесіндегі шағын бақ биыл қала әкімдігінің тапсырмасымен абаттандырылып жатыр. Көлік жолы жаңартылып, жаяулар жолы да салынды. Енді көгалдандырылып жатыр. Шағын бақ бойындағы талдар кәсіпкерлердің қолдауымен тағы қырым қарағайларымен толықты. Ағаш отырғызуға қала әкімі, коммуналдық қызмет өкілдерімен қатар қала тұрғындары да атсалысты. Солардың бірі - Бейбіт Қонақбаев. Кереев көшесінің тұрғыны мұндай бастамаға қуанышты екендерін айтады. Себебі, теміржол вокзалы маңында көлік нөпірі көп. Адам да көп жүреді. Ал, жасыл желек таза ауаның кепілі. Мұндай игі іске жас та, жасамыс та үлес қоса алады, дейді қария. Демалыс күндері отырғызылған қырым қарағайлары көгалдандыру, құрылыс және халық медицинасы салаларында бірқатар артықшылықтарға ие. Олар күтімді көп қажет етпейтіні, газға төзімділігі және еңістерді бекіту қабілеті үшін бағаланады. Ағашы берік әрі ұзақ мерзімді, ал қылқаны мен тозаңы қабынуға қарсы емге қолданылады. Шағын бақтағы жұмыстар келесі жылы аяқталады деген жоспар бар. Мұнда алда орындықтар, қоқыс жәшіктері орнатылып, жарықтандыру жұмыстары жүргізіледі.Количество показов: 7
Дата создания: 02.12.2025 08:37:15
