Келесі аптада 5-ші сынып оқушылары үшін кезекші топтар ашыла бастайды. Қазір ата-аналардың өтініштері қабылданып жатыр. Бүгінгі күнге дейін 3564 өтініш түскен. Бұл туралы өңірлік коммуникациялар қызметінде облыстық білім басқармасы басшысының орынбасары Гүлназ Сүлейменова мәлімдеді. Екінші оқу тоқсанында 140 мың оқушы қашықтан білім алуда. Шалқар ауданының бір мектебі оқушысынан коронавирус анықталған соң екі аптаға карантинге жабылған. Мектеп толықтай санитарлық залалсыздандырудан өткен. Оқушы кешенді ем қабылдап жатыр. Жұлдыз Мейірханова жалғайды.Облыстық білім басқармасынан хабарланғандай, екінші оқу тоқсанында аса өзгешелік жоқ. 6 аптаға созылатын тоқсанның алғашқы аптасы аяқталуға жақын. Бірінші тоқсандағы секілді 1- сынып оқушыларына баға қойылмайды. 2-ден жоғары сынып оқушыларының сабақ үлгерімі бағаланады. Келесі аптадан бастап облыстың барлық мектептерінде 5-ші сынып оқушылары үшін 279 кезекші сынып ашылады. Ата-аналары өтініш жазған шамамен 4 мыңға жуық бала мектепке барып оқуы мүмкін. Мектептердегі тазалық жұмыстары алғашқы орында. Барлық мектепте санитайзер аппараттары жұмыс істеп тұр. Ковид жұқтырып алған 10 мұғалім ауруханаға жатып шыққан. Олармен байланыста болған әріптестері ПТР- тестілеуден өткен. Ешбірінен коронавирус белгілері анықталмаған. Ал, өткен аптада Шалқар ауданындағы ауылдық мектеп оқушысынан коронавирус анықталуына байланысты білім ордасы екі аптаға карантинге жабылды. Оқушылар қашықтан білім алуда. Қашықтан оқытылатын мектеп оқушыларын интернет желісімен қамтамасыз ету үшін жергілікті қазынадан 492 млн теңге бөлінген. Ал 5459 бірлік ноутбук алу үшін 1 млрд теңге қарастырылған. Оқушыларға 11 мың 981 техника үлестірілген. Қараша айының соңына дейін өңірге өзге аймақтардан 7 мың компьютер жеткізілуі тиіс.