Бүгін облыс әкімдігінде облыстық мемлекеттік қызмет істері және сыбайлас жемқорлыққа қарсы іс-қимыл департаментінің мұрындық болуымен ведомствоаралық жұмыс тобының отырысы өтті. Топ мүшелері аймақтағы мемлекеттік қызмет көрсету сапасын талдады. "Жасырын сатып алушы" әдісімен жүргізілген қоғамдық бақылау барысында анықталған кемшіліктер жария етілді. "Жасырын сатып алушы" әдісімен халыққа қызмет көрсетуші мемлекеттік қызметкерлердің іс-әрекеті бақыланған. Бейнежазбаға кейбір адамдардың құқықтық сауатсыздығын, шетелдіктердің тіл білмейтінін пайдаланып, "ауадан ақша жасап жүрген" делдалдар да түсіп қалған. Бұрын мұндай делдалдар арнайы мамандандырылған халыққа қызмет көрсету орталығында көлігін, көлік құжаттарын рәсімдеуге келгендерді жағалап жүретін. Бұл қызмет түрлері электронды үкіметке ауысқалы олар да енді миграциялық қызмет көрсету мекеніне ауысқан сыңайлы. Аңдығандары шетел азаматтары көрінеді. Ертас Бисеновтің сөзінше, проблеманы құзырлы органдар бірлесе шешуі тиіс. Алдымен бұл облыстық полицияның айналысатын жұмысы. Заңсыз қызмет көрсетушілер мемлекетке салық та төлеп жатқан жоқ. Сондықтан мемлекеттік кірістер департаментінің де мүддесі бар. Проблема ортаға тасталды. Енді бірлескен түрде оны шешу жолдары қарастырылады.