Кәсіпорындарға 10 миллиард теңгеден астам айыппұл салынды
Аймақ экологтары жыл басынан бері 70 кәсіпкерлік субъектісіне тексеру жүргізіп, табиғат қорғау заңнамасының 443 бұзушылығын анықтаған. Заң бұзушылықтарды жою мақсатында берілген 182 нұсқаманың дені орындалыпты. Тексеру нәтижесінде кәсіпорындарға жалпы сомасы 10 миллиард теңгеден асатын 228 әкімшілік айыппұл салынған. Ең ірі айыппұл арқалағандар қатарында - "Қазақтүрікмұнай" серіктестігі, Қазақстандық мұнай жабдықтары зауыты бар. Ақтөбе - өнеркәсіптік өңір. Мамандардың мәліметінше, былтыр шығарындылардың жалпы көлемі 44 жарым мың тоннадан асқан. Өнеркәсіптік шығарындылардың негізгі үлесі - "СНПС-Ақтөбемұнайгаз", "Қазақойл Ақтөбе" және "Қазхром Трансұлттық компаниясына" тиесілі. Өңірде өнеркәсіптік кәсіпорындардың шығарындыларын бақылау күшейтілген. Қазіргі таңда бірнеше ірі кәсіпорында автоматтандырылған экологиялық мониторинг жүйесі жұмыс істейді. Нәтижесінде облыста атмосфераға таралатын зиянды шығарындылар көлемі өткен жылмен салыстырғанда 5 пайызға азайған. Аймақтағы тағы бір мәселенің бірі - рұқсат етілмеген жерлерге қоқыс қалдықтарының төгілуі. Биыл облыс аумағында ғарыштық мониторинг арқылы 119 заңсыз қоқыс орны анықталған. Олардың қатарында шаһардың Алматы және Астана ауданы, Алға, Мәртөк, Мұғалжар, Хромтау және Қарғалы аудандары бар. Оның 37-сі жойылып, қоқысты уақытында тазаламаған жауапты тұлғалар әкімшілік жауапкершілікке тартылған. Облыс бойынша ғарыштық зондтау қарашаға дейін жүргізіледі.Количество показов: 10
Дата создания: 10.07.2026 08:08:43
