Облыстық кәсіпкерлер палатасында бүгін қоғамдық қабылдау өтті. Қабылдауды кәсіпкерлердің құқығын қорғау кеңесі прокурормен бірге жүргізді. Қабылдауға келгендердің заң тұрғысынан шешуі қиын күрделі мәселелері көп. Егер кәсіпкер зардап шеккен болса, оның мүддесін кәсіпкерлер палатасының заңгерлері қорғауға көмектеседі. Лидия Святкина бір ғимараттың бір бұрышын жалдап, сол жерде шағын кондитерлік цехының жұмысын жүргізген. 2007-шы жылы осы үшін лицензия алады. Ал 2012-ші жылы кәсібін тоқтатып, лицензиясын мемлекеттік кірістер басқармасына тапсырады. Лицензия тапсырылды деген салықшылардан анықтама құжат та бар. Алайда лицензия мемлекеттік кірістер басқармасында жоғалып кеткен. Бірақ, басқармадағылар я бізге тапсырмадың, я өзің жоғалтып алдың деп бар кінәні Лидия Святкинаның өзіне арта салған. Онымен қоймай жеке кәсіпкерден ірі көлемде айыппұл өндіріп алған. Жағдайын әйел бүгін прокурор мен кәсіпкерлердің құқығын қорғау кеңесінің мүшелеріне айтты. Кеңес көмектесетін болды. Жыл басынан бері облыстық кәсіпкерлер палатасына 300-дей кәсіпкер осындай мәселелер бойынша көмек сұрап келген. 50 пайызы оң шешілді. Қалғандары қаралып жатыр. Кәсіпкерлердің құқығын қорғау кеңесінің биылдыққа 11 отырысы өткен. 22 адам қабылдауда болып, көтерілген мәселенің 76 пайызы шешімін тапты.