Жеке балабақшаларда тәрбиеленушілердің жағдайын жасау үшін мемлекеттен бөлінетін қаржы жеткіліксіз. Бүгін мәселе - облыстық "Атамекен" кәсіпкерлер палатасында қаралды. Қазір мемлекеттік-жеке меншік серіктестік аясында 1 бала үшін жеке балабақшаға бюджеттен 19 354 теңге төленіп жүр. Кәсіпкерлер енді ол бағаны 31 мың теңгеге дейін көтеруді сұрайды.
Мемлекеттік-жеке меншік серіктестік аясында мемлекеттен әр балаға 19 354 теңге алып келген кәсіпкерлер енді бұл ақшаны 31 мың теңгеге дейін көтеруді сұрайды. Себебі, шығын өтелмейді. Жеке балабақшалардағы балалар үшін жағдай жасау қиындаған. Азық-түлік пен коммуналдық қызметтер қымбаттап кетті. Оған қоса, президенттің соңғы жолдауында айтылған тапсырма тағы бар. Тәрбиешілердің жалақысын көтеру қажет. Бұл мәселе - үш жылдан бері айтылып келеді. Бірақ, әзірге нәтижесіз. Кәсіпкерлер облыстық "Атамекен" кәсіпкерлер палатасына жүгінген. Мәселені кәсіпкерлермен бірге облыстық мәслихат хатшысы Сәния Қалдығұлова, қала әкімінің орынбасары Рузия Айдашева, білім және кәсіпкерлік, экономика мен бюджетті жоспарлау басқармаларының басшылары талқылады. Жеке балабақша басшыларының сөзінше, мемлекеттен төленетін қаржы артса, ата-аналардың қалтасына түсетін күш азаяды. Және мектепке дейінгі мекемелердің материалдық-техникалық жағдайын жақсартуға мүмкіндік туады. Қазір шаһардағы жеке балабақшаларға бір жылға қала бюджетінен 2 млрд. 600 мың теңге бөлінеді. Егер әр бала үшін жеке балабақшаға төленетін қаржы 31 мың теңге болса, онда бюджеттен бөлінетін ақша 2 есеге артады. Билік өкілдерінің айтуынша әр бала үшін 31 мың теңгеге дейін көтеруге әзір мүмкіндік жоқ. Жыл соңына дейін қосымша қаржы қарастырылмаған. Қала әкімінің орынбасары Рузия Айдашева қосымша қаржы бөлу мәселесі тек келесі жылы ғана қаралатынын жеткізді. Осы жылды ешқандай қарызсыз жабу қажет. Облыстық мәслихат хатшысы Сәния Қалдығұлова мәселені өз бақылауына алды. Білім және қаржы басқармаларының мамандары балабақшалардағы жағдайға байланысты шығындарды көрсетулері тиіс.