"Бизнес-Бастау" жобасымен арнайы курстан өтіп, сертификаттарға ие болған мүмкіндігі шектеулі бірқатар ақтөбелік тығырыққа тірелді. Олар әрі қарай бизнес жобаларын қорғау сатысына өте алмай отыр. Ол үшін 1-2-ші топтағы мүгедектерден еңбекке жарамды деген анықтама талап етілуде. Ақтөбелік Айгүл Аккушкарова қаланың жұмыспен қамту және әлеуметтік бағдарламалар бөліміне күнде келеді. Себебі, мұндағылар оның өтінішін қанағаттандырмай отыр. Айтуынша, ұлы Нұржан Утегулов 2-ші топтағы мүгедек. Ол өткен жылдың күзінде облыстық кәсіпкерлер палатасының "Бизнес- Бастау" мектебін тәмамдаған. Жыл соңында құжаттарын тапсырып, биыл өз бизнесін жүзеге асыру үшін грантқа емтихан тапсыруы керек болған. Алайда, пандемияға байланысты бұл шара кейінгі қалдырылып келген. Карантин аяқталысымен еңбек биржасында емтихандар басталды. Алайда, Нұржан ол емтихандарға кіре алмай жүр. Себебі, қалалық жұмыспен қамту және әлеуметтік бағдарламалар бөлімінде одан жеке оңалту бағдарламасы анықтамасын талап етіп отыр. Бұл құжат азаматтың еңбекке жарамдылығын растайды. Мүгедек құқығын қорғап жүрген жалғыз Айгүл емес. Надежда Гумарова да "Бастау" сертификатын иеленген қайын атасының жылыжай ашсам деген жобасын жүзеге асыруды көздеп жүр. Ол тіпті талап етілген анықтаманы тапсырған да. Алайда белгісіз себептермен грант иелене алмай отыр. Тұрғындар емтихан қабылдап отырған комиссияның алдына бүгін де барды. Алайда, ондағы адамдар сертификат алған мүгедектерге неліктен грант берілмей отырғанын тағы да түсіндіре алмады. Бар болғаны еш жерде берілмейтін анықтаманы талап етіп отыр. Тұрғындар енді сотқа жүгінуге ниетті.