Әуе қалашығы ауданындағы көп қабатты үйлердің бірінде қамқоршысы жоқ қариялар күн кешіп жатыр. Зейнет жасындағы тұрғындардың жайына алаңдаған көршілері арнамызға шағымданды. Әуе қалашығы ауданындағы №29-шы үйдің 34-пәтерінде күтімі жоқ қариялар тұрып жатыр. Тілеген мен Пердегүл Елшекеновтер зейнет жасында. Көшіп келгендеріне бір жылдай уақыт болған. Алғашында қарияларға көмек қолын созып, жәрдемдескен көршілері бүгінде осы пәтер иелерінің кесірінен зардап шегіп отыр. Көршілердің айтуынша, ақсақалдың құлағы естімейді. Ал кейуана төсек тартып жатыр. Киімдерін ауыстырып, төсек жайын жаңартатын ешкім жоқ. Сәйкесінше, қазір бұл пәтерден тараған жағымсыз иіс, түгел үйді алып тұр. Көршілердің ендігі үміті үкіметтік ұйымдарда. Олардың шағымына елең етер бір жан табылып, қарияларды қарттар үйіне орналастыруға көмектессе екен дейді. Ата-анасын қараусыз қалдырған тас жүрек балалар да жауапсыз қалмауы керек деген пікірде.