"Автомобилист" бау-бақша ұжымында көпбалалы отбасы 4 күннен бері үйін жылыта алмай отыр. Өткен демалыстарда ұжымда газ реттеуші пункт істен шығып, 300-ге жуық үйге көгілдір отын беру уақытша тоқтатылған. Шақыртылған жұмысшылар жөндеу жүргізіп, түннің ортасында үйлерге газ берілген. Ал бау-бақша ұжымындағы бір-ақ үйдің адамдары газдың қайта берілуін күтпестен ұйықтап қалса керек. Таңда оянғанда құбырлар бойындағы су қатып қалған. Шарасыз күйде қалған отбасы редакциямызға жүгінген еді. 6 баланың анасы Замира Бекжанова үйінің ішінде не істерге білмей сенделіп жүр. Бөлмелер астаң-кестең. Бойына су қатқан құбырларда жолдасы өздігінен қыздырмақ болған. Онысынан түк те шықпапты. Ақыры құбырларды кесуге тура келген. 6 бала бір бөлмеде тығылып отыр. Үлкендерін күйлері кеткен ата-ана сабаққа да жібермеген. Бір жағынан үйдің иелері бәрін қалпына келтіріңдеп деп қыспаққа алып жатқан көрінеді. Отбасы бау-бақша ұжымындағы баспананы жалдап отыр. Телефонның арғы жағынан аты-жөнін айтудан бас тартқан, осы аумақтың белсенді тұрғындарының бірі "Автомобилист" бау-бақша ұжымында газбен проблема жоқ, дейді. Әйелдің айтуынша, саяжайда екі бірдей газ реттегіш пункт жұмыс жасап тұр. Осылайша газ берілген бойда пеш қосылмағандықтан құбырлар бойындағы су қатып қалған. Енді жылытқыш пешті де, құбырларды да қайта ауыстыру қажет.