Әбілқайыр хан даңғылы №57 үйдің тұрғындары бүгін жаппай наразылыққа шықты. Жиналғандар үш жылдан бері күндіз күлкіден, түнде ұйқыдан қағылғандарын айтады. Жұртшылықты толғандырған бірнеше мәселе бар. Бес қабатты үйдің артқы қасбеті жоғары кернеулі электр сымдарынан көрінбейді. Күн санап ашылып жатқан шағын бизнес нысандарының иелері үй маңындағы электр қуатын таратқыш станциясынан тұрғындардың рұқсатынсыз тікелей тоқ тартуды әдетке айналдырған. Өмірлері үшін қауіптенген жұртшылық бұған тосқауыл қоюға талпынғанмен еш нәтижесіз болып отыр дейді. Шаһардың орталық даңғылында орналасқан бұл бес қабатты үйде 90 отбасы өмір сүріп жатыр. Дені жас отбасылар, зейнеткерлер тұрады. Берісі он жылдап, әрісі 50 жылдан аса осы уйде тұрып келеді. Байырғы тұрғындардың бірі Валентина Проскуркина соңғы бес жылда қалада шағын бизнес саласы қарыштап дами бастағалы осы маңдағы үйлердің соңғы қабаттары сан өзгергенін айтады. Оның жекенің ісіне араласқысы жоқ. Тек айналаға зияны тимесе болды деген тілегі бар. Үйді үш жыл ішінде шырмауықша жапқан электр желілерінен тұрғындар зәресі қалмай қорқады. Жаңбыр күні қауіп екі еселенеді дейді. Тұрғындар мәселелерін айтып үш жылдан бері талай мекеменің есігін қаққан. Жауап мардымсыз. Құзырлы органдар бір-біріне сілтейді. Амалдары таусылған жұртшылық, сәуір айының басында 67 тұрғынның қолы қойылған үшбу хатты қалалық тұрғын үй инспекциясы бөліміне жолдайды. Аталмыш мекеме үйдің шаруашылығына жауапты "Таң" пәтер иелері кооперативі төрағасы Александр Пырковпен сөйлесе келе сымдарды тарту кезінде қауіпсіздік ережелері бұзылғанын анықтаған. Құжатқа бұл заңсыздықтар нақты жазылып, үлкен кернеулі электр сымдары арнайы бөренеге не себепті ілінбегені туралы жауап беруін сұрап, қалаға электр қуатын беруші мекемеге хат жолдаған. Хатқа жауап апта соңына дейін келуі тиіс. Мекемеге екі аптаның ішінде жауап қайтаруға уақыт берілген. Ал, тұрғындар болса үш жыл бұрын бұл сымдарды тартуға қатысты алдын ала келісім жасалатындай ешқандай жиын болмағанын айтады.