Аптап ыстықтан кейінгі жауын ақтөбеліктерді біраз сергітіп тастады. Бірақ шамадан тыс ылғал ылдида орналасқан үйлерге кіріп, тұрғындар қауіпсіз жерге көшуге мәжбүр болған. Қалалық мешіт аумағындағы Жыра көшесінде бір үй бел ортасынан қызыл су ішінде қалды. Тағы төрт үйдің ауласын су шайып кеткен. Оған тұрғындар былтыр жөнделген жол септік етті дейді. Жұмысшылар асфальттау кезінде жолды бұрынғысынан әлдеқайда биіктетіп жіберген. Енді жаңбыр суы төменде қалған үйлерге құйылып жатыр. Жұлдыз Мейірханова тарқатады. Жаңбыр суынан Жыра көшесінде тұратын бес үй зардап шеккен. Тұрғындардың аулалары бүлініп, үйректері суға кеткен. Тұрмыстық техникалары бүлінген. Үйін су басқан Байрамбай Сейітовтың отбасы туыстарын жағалап, бүгін таңда көшіп кеткен. Отағасының жанында әйелі қалыпты. Жаңбырдың түнімен құйғанынан қауіптендім. Бірдеңені сезген екенмін ғой, дейді жұбайы. 2011- жылы өз күштерімен тұрғызған баспаналары қазір аянышты күйде тұр. Төменгі қабатты 70 см-ге дейін су шайған. Төртінше рет шақыртылған су сору техникасы ауланы ақыры құрғата алмады. Кішкентай немересінің жататын кереуеті, бүкіл жиһаз суға кеткен. Су сар етіп төгілген кезде тек құжаттарымызды алу ғана ойға келді, дейді олар. №1,9,11,13 үйлердің де аулаларын да қызыл су шайған. Алдағы екі күнге болжанған жауыннан қауіптенген тұрғындар жаппай су соратын көлік шақыртып, аулаларын құрғатуға кіріскен. Тұрғындардың жағдайымен қалалық әкімдіктен жіберілген өкіл арнайы келіп танысты. Мәселе қалай шешілетіндігі турасында мәлімет беруден бас тартты. Тіпті жиналып жауап күткен тұрғындардың өзімен көп тілдеспеді. Суға кеткен Жыра көшесінің жағдайы қалай болатыны әзірге белгісіз. Тұрғындардың айтуынша, бұл тәуелсіздік алған жылдарға дейін бүкіл ТМД мемлекеттеріне атағы шыққан көшелердің бірі болыпты. Өйткені бұл көшеде Кеңес Одағының батыры Әлия Молдағұлова тұрған. Кейіннен мүлде елеусіз қалып, соңғы жылдары көше жарамсыз күйге енген.