"Азаматтық қоғам және мемлекет: Диалог. Ынтымақтастық. Жауапкершілік". Ақтөбеде бүгін осындай атаумен үкіметтік емес ұйымдардың 8-облыстық форумы өтті. Мемлекеттік органдар мен үкіметтік емес ұйымдар арасындағы жүйе дұрысталуы шарт. Сонда ғана қоғамдағы барлық мәселені шешуге болады. Сол себепті бүгінгі форумның маңызы мен жауапкершілігі жоғары. Дегенмен мәселе көп. Форумға қатысқан Қоғамдық даму министрінің орынбасары Сергей Коновалов осылай деді. ҮЕҰ, қоғамдық бірлестіктердің жұмысын арттырып, қоғам алдындағы беделін көтеруге бағытталған форумға Қазақстанның азаматтық Альянсы төрағасының орынбасары Мұсағали Дуанбеков, өңірдегі үкіметтік емес, қоғамдық ұйымдардың өкілдері мен еріктілер де қатысты. Вице-министрдің сөзінше, біздің аймақ елде көтерілген мәселені шешуге аса мән беретіндігімен көш бастап тұр. Ол облыс тұрғындарын өте белсенді деп бағалады. Өңірде 600-ден астам коммерциялық емес ұйым тіркелген. 330-дан көбі қоғамдық бірлестік. Үкіметтік емес ұйымдардың 20 пайызға жуығы аудандарда тіркелген. Қоғамдық бірлестіктер арасында діни тұрақтылықты қаматасыз етуге жауаптылары да бар. Темір ауданындағы "Болашақ жолы" ҚБ еліміздегі теолог мамандарды ауылдарды аралап, түсіндіру жұмыстарын жүргізуге шақырады. Бірлестік өкілдері аудандағы барлық ауылдың тұрғындарымен кездескен. ҮЕҰ-дың жұмысын қолдау мақсатында биыл облыста 420 млн. теңгеден көп қаржы бөлінді. Мемлекеттік-әлеуметтік тапсырысқа сәйкес 118 жоба жүзеге асырылып жатыр.