Елде заңсыз нөмір көшірмесін тағынған автокөліктер көбейіп барады. Облыстық мемлекеттік қызмет істері және сыбайлас жемқорлыққа қарсы іс-қимыл департаменті мамандары ғаламтор кеңістігіне де бақылау, тексеру жүргізеді. Заңсыз хабарландырулардың жолын кесу үшін. Мәселен, әйгілі OLX сайтынан жаныңа қажеттінің бәрі табылатыны баршамызға аян. Алайда арты қылмыстық жауапкершілікке әкеп соқтыратын заңсыз хабарландырулар да сол жерден табылып жатыр. Осы онлайн сауда кеңістігінде көлік нөмірлерінің заңсыз көшірмесін жасаушылар өз өнімдерін ашықтан ашық саудалап отыр. Облыстық полиция департаменті әзірге осындай нөмір тағынған 3 көліктің иесін анықтаған. Оларға қатысты жаза қолдану мәселесі шешіліп жатыр. Егер мемлекеттік көлік нөмірінің түпнұсқасын тағып жүрген жүргізушіге жол ережесін бұзғаны үшін айыппұл салынғаны хабарланатын болса, дереу нөмірдің көшірмесін іздеу керек. Өйткені Қазақстанның бір түкпірінде дәл сондай нөмірмен тағы бір адам жүрген болуы мүмкін. Ал бұл енді мемлекеттік қызметкерлердің әдепсіздігі жөнінде. Ақпан айында мемлекеттік қызмет істері және сыбайлас жемқорлыққа қарсы іс-қимыл департаментінің қызметкерлері "Құпия сатып алушы" әдісімен аудандардағы мемлекеттік қызмет көрсетушілер арасында тексеру жүргізген. Өз қызметіне лайық емес қылық көрсеткен қызметкерлер тәртіптік жауапкершілікке тартылған. Одан бөлек, департамент мемлекеттік қызмет көрсету сапасына бақылау жүргізіп отырады. Аймақта жыл басынан бері 1,5 миллион мемлекеттік қызмет көрсетілген. Оның басым бөлігі жергілікті атқарушы органдарда. Мемлекеттік қызметкерлер әлі күнге дейін азаматтардан артық құжат талап ету, қызмет көрсету мерзімін бұзу, мемлекеттік қызмет көрсетуден негізсіз бас тарту секілді заң бұзушылықтарға жол береді.