Автобустың жолдан тайып, апатқа ұшырауына көктайғақ себеп. "Автопарк" мекемесінің өкілі Руслан Жылқаманов кеше Пригородный елді-мекеніне жақын жерде №29 автобустың жүк көлігіне соқтығысып қалуына қатысты осындай түсінік берді. "Автопарк" қызметкері 29-автобус кеше таңертең рейске шығар алдында тексеруден өткен, техникалық жағдайы жақсы болған дейді. Түсте келесі рейске тұрақтан жол тартқан қоғамдық көлік Ақжар көпіріне көтерілер тұста көктайғақтан бағытынан ауып, "Камазға" соққан. Үлкен автобустарда жүк көліктеріндегідей дөңгелектеріне тікен салынбайды, техникалық тұрғыда қарастырылмаған. Сондықтан, рөлге отырған әр жүргізушіге күнде таңертең қауіпсіздік талаптарын сақтауды ескертеміз, дейді "Автопарк" өкілі. Дегенмен, автобус жүргізушілерінің бәрі бірдей жол қозғалысы қауіпсіздігі, жолаушыларды тасымалдау ережелерін сақтамайды. Көктайғақта жылдамдықты асырып, жолаушы үшін таласатын жүргізушілер жоқ емес дейді тұрғындар.