"Нұр Ақтөбе" ықшам ауданындағы тұрғын үйлердің ішкі жұмыстарына тартылған құрылыс бригадасы еңбек ақыларын ала алмай отыр. Жұмыс берушісімен арадағы мәселені шеше алмаған бір топ адам бүгін біздің редакциямызға жүгінді. «Еңбектің наны тәтті». Ал еңбектенгенімен тиісті жалақыны ала алмаса не істеу керек? "Нұр Ақтөбенің" 1-ші ықшам ауданында №50-ші үйдегі 2-ші подъездің қабырғаларын сылауға жауапты мердігер компания жұмысшылары екі айдан бері еңбекақыларын ала алмай жүр. Олар жұмысқа кірісер алдында «Инвест Строй» ЖШС-мен келісімшарт жасасқан. Жұмыс беруші әр 15 күн сайын есептесуі тиіс болған. Алайда кыркүйек айының бастапқы 15 күні үшін ғана еңбекақы төленіп, қалған 2 жарым айда жасалған жұмыстың ақысы, яғни 3 миллион теңге көлемінде қаржы өтелмеген. Жұмысшылар отбасымызды асырау қиынға соғып отыр дейді. 50-ші үйдің алдына жиналған 6 адамның сөзіне сенсек, аталған компания басшысы Дмитрий Стратан 2 апта бұрын бұл адамдармен байланысқа шығуды тоқтатқан. 50-ші үйдің ішкі сылақ жұмыстарына тартылған оншақты адамнан бөлек мұнда жұмыс істейтін 2 электрик те жалақы алмаған. Олар «Инвест Строй» ЖШС директорын үйдің алдынан күтіп тұрып, ұстап алған. Сонда ол "айлықтарыңды 10 күннің ішінде береміз" деп жауап берген. Жұмыс беруші уәдесінде тұрмаса, жұмысшылар сотқа жүгінбек. Облыстық еңбек инспекциясының мамандары осы мәселе бойынша тексеру жүргізіп, төлемдердің кешіктірілу себебін анықтып, мәлелені шешу үшін азаматтарға еңбек инспекциясына жүгінуге кеңес берді.