Интернет алаяқтардың құрығы ұзын

Ақтөбеде интернет алаяқтардың құрбандары азаймай тұр. Онлайн сауда жасап, ауыздары күйгендер көп. Облыстық полиция департаменті әлеуметтік желілер мен онлайн-платформаларда тауар сатуға байланысты алаяқтық фактілерінің көбейгенін ескертіп, дабыл қақты. Облыста интернеттегі алаяқтық жағдайлары азаймай тұр. Полиция дерегінше, тұрғындар арзан тауарға қызығып, белгісіз сатушылардың есепшотына ақша аударып, ақырында дымсыз қалып отыр. Жақында қала тұрғыны арзандатылған бағамен iPhone 15 Pro Max алып беремін деген жарияланымды көріп, сатушының есепшотына 400 мың теңгеден астам ақша аударған. Алайда ақша түскен соң сатушы хабарсыз қалған. Ал тағы бір тұрғын әлеуметтік желі арқылы ер адамға арналған костюм сатып алмақшы болып, 263 мың теңгесін сатушыға жіберіп қойған. Ақша аударылған соң сатушы аккаунты сатып алушыны бұғаттап тастапты. 46 жастағы тағы бір ақтөбелік те балаларға арналған тауарды интернеттен сатып алмақ болып, 150 мың теңгеден астам қаржысынан айырылған. Тауар оған ешқашан жіберілмеген. Полиция мұндай деректердің соңғы айларда жиілегенін айтады. Алаяқтар көбіне төмен баға ұсына отырып, алдын ала толық төлем жасауды талап етеді. Тұтынушы тауарды күтіп жүргенде сатушы аккаунтын өшіріп немесе бұғаттап тастайды. Құқық қорғау органдары сатып алар алдында сатушының ресми парағын тексеру, жеткізу қызметі бар сенімді платформаларды пайдалану және белгісіз адамдарға алдын ала төлем жасамау керектігін ескертті.
Количество показов: 19
Дата создания: 20.11.2025 08:58:20