Облыста соңғы екі жылда қант диабетімен ауыратындар саны артқан. Мамандар бұл кеселдің жасарып бара жатқанын айтады. Аурудың осы түріне шалдыққандар инсулинге тәуелді. Алайда науқастардың бұл дәріге қолы жетпей жүр. Биыл сырқаттарды инсулинмен тегін қамтамасыз ету үшін облыстық бюджеттен 300 млн.теңге қаржы бөлінді. Тапшылық болмауы тиіс деп мәлім етті бүгін облыстық денсаулық сақтау басқармасының мамандары. Ақтөбеліктер қала әкімі Ілияс Испановтың есеп беру жиынына арнайы барып, инсулин мәселесін көтерген болатын.
Дәрі-дәрмектің емханаларға уақытында жеткізілуі тез бітетін шаруа емес. Биыл дәрі-дәрмекке қатысты тендер тәртібі өзгертілген. Препараттардың кешігуіне де осы себеп. Инсулин препараты қала емханаларына бүгін толықтай жеткізілуі тиіс. Ал шалғайдағы елді мекендерге дәрі жеткізу ауа-райына байланысты. Аптаның соңына дейін ауылдарға да жетеді. Дәрілердің кешіктірілуіне-елімізде дәрі-дәрмектерді сатып алуды ұйымдастыру және өткізу ережелеріне өзгерістердің енгізілуі себеп,-дейді облыстық денсаулық сақтау басқармасының мамандары. Тегін дәрі-дәрмек алу үшін ереже бойынша белгілі бір сырқатпен ауыратын науқас жандар тұрғылықты жеріндегі емханада есепте тұруы керек. Мұндай препараттар әуелі гепатит, қант диабеті, туберкулез, онкологиялық аурулар мен ВИЧ-ке шалдыққандарға беріледі. Ресми мәліметтерге сүйенсек, өңірімізде 83 мың адам тегін дәрі-дәрмекпен қамтылған.