Елде имамдар мен дін қызметкерлерін аттестаттау басталды. Облыстың имамдары емтихан тапсыру үшін бүгін "Нұр ғасыр" орталық мешітіне жиналды. Қазақстан мұсылмандары діни басқармасының ережесіне сай елде имамдар мен дін қызметкерлері 5 жылда бір мәрте аттестаттаудан өтіп тұрады. Бүгін Ақтөбе имамдары сынақ тапсырды. Облыс бойынша емтиханға 105 адам жиналды. Алдымен олар тесттің 60 сұрағына жауап берді. Тестілеуге 1 сағат уақыт берілді. Биыл алғаш рет тестілеу компьютермен жүргізіліп жатыр. Сұрақтар емтихан тапсыратындардың алдын ала дайындалып келуі үшін 1 ай бұрын беріліп қойған. Үлкен кісілер компьютер қолдануды үйренген. Бүгінгі аттестаттауға жастармен иық тірестіріп, ақсақалдар да келген. Шалғай ауылдарға жоғары, орта-арнаулы білімі бар дін қызметкерлерінің жетіспей жатқаны жасырын емес. Зейнет жасына жеткен ақсақал имамдарды ауыстыратын жас мамандар жоқ. Олар жағдай жасалмағандықтан ауылдарға барып, қызмет еткісі келмейді. ҚМДБ-ның тарапынан қолға алынған "Зияткер имам" жобасы бар. Осы сынақта үздік нәтиже көрсеткен зияткер имамдар қатарын толықтырады. Алдағы уақытта лауазым, қызметтерін жоғарылатуға ұсынылады. Ал емтиханнан өтпегендеріне 1 ай көлемінде тағы бір мүмкіндік беріледі. Ол кезде де төменгі нәтиже көрсетсе, қайта даярлықтан өтуге, білімін жетілдіруге бағытталады.