Игорь Рахаев өзі футбол ойнап, жартылай қорғаушы болған. 2002-жылдан бері бапкер болып жүр. Бүгінге дейін Украинаның «Металлист» және Харковьтің «Арсенал», Молдавияның «Заря» командаларын жаттықтырған. Бас бапкер ретінде әр жылдары Украинаның бірінші, екінші лигасында күміс жүлдеге ие болды. Ал биыл Молдова Кубогінің иегері атанды. Бапкер Ақтөбеге алғаш рет келіп отыр. Ұсыныс түскен бойда «Ақтөбе» футбол клубының ойындарын қарап, жан-жақты танысқанын айтты. Бас бапкермен бірге қақпашымен жұмыс істейтін, ойыншылардың физикалық дайындығына жауап беретін арнайы мамандар шетелден шақырылуы мүмкін. Дегенмен, тәжірибе жинау үшін жергілікті мамандар да тартылады. Десе де, Игорь Рахаев бірінші кезекте қазіргі ойыншылар құрамынан бәсекеге қабілетті ұжым жасап шығаруды өзіне міндет етіп отыр. Ол осы айдың 15-де команданы жинап, футболшылармен жеке-жеке таныспақ. Ал, қаңтар айында Түркияда үш жаттығу жиынын өткізеді. Ақтөбелік жанкүйерлерлер сенім білдіріп, жаңа бапкерге қазақтың дәстүрі бойынша шапан жапты. Рахаевқа қандай жалақы тағайындалатынын клуб басшылығы ашып айтпады. Бірақ, бұрынғы бапкердің еңбекақысынан аз болмайды деді.