Госпитальдерде науқастарды қабылдайтын орын жетпей жатыр. Медицина қызметкерлері тапшы. Қалада пневмониямен ауырғандарды қабылдайтын 3 провизорлық аурухана бар. Олар: Ақтөбе медициналық орталығы, бұрынғы темір жол ауруханасы және облыстық туберкулезге қарсы күрес диспансері. Арнамыздың түсірілім тобы бүгін соның екеуінде болып, ол жақтардағы жағдайды білді. Облыстық туберкулезге қарсы күрес диспансерінің провизорлық госпиталь болып жасақталғанына көп болған жоқ. Мұнда пневмониямен ауырғандарға 500 орын әзірленген. Ешқайсысы бос емес. Палаталар лық толып, сырқаттар дәліздерге жатқызылып жатыр. Аталған ауруханаға науқас анасын әкеліп жатқызған Александр Бойченко дәрігерлерге наразы. Айтуынша, анасы мұнда түскен күннен бері қараусыз жатыр. Александрдың сөзіне сенсек, ауруханада санитарлық талаптар да бұзылған. Төсек жабдықтары аяқтың астында жатыр. Сондай-ақ, дәрі-дәрмек те жетіспейді. Алайда, ол мәселе емес дейді, өздері сатып әкеп беруге бар. Тек лайықты ем жасалса болғаны. Дәрігерлердің бұл сөзіне ызаланған Александр анасын басқа жерге апарып жатқызуға ниетті. Ол ақылы бөлімнен орын сұрап, бұрынғы темір жол ауруханасына да барды. Алайда, бұл аурухана өткен аптада-ақ толып қалған еді. Қазір мұнда ешқандай науқас қабылданбайды. Ал Ақтөбе медициналық орталығында жағдай тұрақтанған. Сәуір айынан бері провизорлық аурухана болып қызмет етіп келе жатқан орталықта қазіргі таңда 360-тан астам науқас жатыр. Бүгін мұнда тағы 40-қа жуық өкпесі қабынған науқас әкелінген. Орталық мамандары оларға қандай ем-дом жасалып жатқанын айтты. Айта кетейік, кеше облыс әкімінің денсаулық сақтау саласы бойынша кеңесшісі Әсет Қалиев бүгіннен бастап 200 орынды «Шағала» сауықтыру орталығы провизорлық стационар ретінде қолданысқа берілетінін хабарлаған болатын. Сонымен бірге екі жеке емдеу мекемесінің басшысымен келісім жүріп жатыр. Жеке емдеу нысандарында провизорлық стационарлар жасақталады.