Жалақымызды көтерсін! Бүгін "Gazservicegroup" ЖШС-нің 120-дан аса бақылаушысы наразылық акциясына шықты. Қызметкерлердің 99 %-ы нәзік жандылар. Мекеме алдына жиналғандар басшылықтан жалақыларын жүз пайызға өсіруді талап етті. Он жылдан бері еңбекақылары көтерілмеген жұмысшылар шыдамның да шегі бар екендігін өткен күз айынан бері ескертіп келеміз дейді. Тыңдар құлақ болмағасын, амалсыздан топ болып жиналып келген. "Газсервисгрупп" ЖШС-де шамамен 120-дан аса бақылаушы еңбек етеді. Түбіртек таратып, төлеммен жұмыс істейді. Үй-үйді аралап тұтыну деректерін жазады. Былай қарағанда түк қиындығы жоқ жұмыс сияқты. Бірақ олай емес, қыста суыққа, көктемде балшыққа, жазда ыстыққа шыдаймыз дейді олар. Еңбекақымыз- 60 мың теңге. Барлығымыздың кемінде 3-4 баламыз бар. Отбасын мұндай жалақымен асырау ақылға сыймайды, дейді мекеме жұмысшылары.
Газ бақылаушыларына жолақы үшін қосымша 7 мың теңге беріледі. Бұл қаржының өзі мардымсыз. Ай бойы жол пұлын өтемейді. Наразылыққа шыққандар жыл сайын еңбек демалысына 24 күнге жіберу заңсыз екендігін де жеткізді. Өйткені бір бақылаушы кемі 3 мың абонентке қызмет етеді. Есеп-қисап жүргізеді.
Мекеме жұмысшылары бұл талаптарын өткен күз айында басшылыққа жазбаша түрде жолдаған. Жылдың басында тағы бір рет ауызша түрде ескерткен. Бірақ жалақыны 100%-ға өсіру талабы сол күйі өтініш ретінде қала берген. Қарастырылады деген жауапқа әбден тойған қызметкерлер бүгін наразылыққа шығып отыр.
Яғни басшылықтың жауабына сенсек, кіші санаттағы барлық қызметкерлердің жалақысын өсіруге мекемеде ресурс жоқ. Еңбекақыны өсіру мәселесі осы себептен 2011 жылдан бері көтерілмей келеді. Серіктестікте қосымша қаражат болмағандықтан жұмысшылардың жалақысы 120 мың теңгеге өспеуі де мүмкін. Дегенмен, "Газсервисгрупп" ЖШС-гі жұмысшыларының талабы "КазТрансГаз" АҚ көлемінде қаралатын болады. Газ бақылаушылары әлеуметтік желілер арқылы ҚР Президенті Қасым-Жомарт Тоқаевтың атына үндеу жасады. Бұл мәселені жабулы қазан күйінде қалдырмаймыз деп отыр наразы топ өкілдері.