Қалада газ тапшы. Сұйытылған газ құю бекеттеріндегі мына көрініске екі айда көз үйренді. Егер кезек болмаса, газдың мүлде жоқ болғаны немесе тек мекемелерге талон арқылы берілетінін білдіреді. Бүгін де қаладағы көптеген газ құю бекеттері бос тұр. Ал 12 ықшам аудандағы мына газ құю бекетінде газдың литрі 37 теңгеден сатылып жатыр. Жүргізушілердің  алды  жарты сағатта қажетті сұйытылған газды құйып алса, кейінгілерінің кезек күткеніне бір сағаттан асты. Газ тапшылығы тек Ақтөбеге тән проблема емес. Орал, Қостанай қалаларында да ұзын-сонар кезек бар. Бұл мәселені тек жергілікті биліктің есебінен тыңдап, мәліметті жинап отырған Энергетика министрлігі енді аймақтарға шығуды жөн санапты. Министрліктің баспасөз хатшысы Асқар Жалдиновтың айтуынша, болжам бойынша арзан газ Ресейге кетіп жатыр. Алғашында 4800 тонна газ жетпейтінін, тамыз айына 5 мың тонна квота сұралғанын айтқан облыстық энергетика және тұрғын үй-коммуналдық шаруалық басқармасы соңғы кездері қандай да бір ақпарат беруден бас тартып отыр. Қазір "СНПС-Ақтөбемұнайгаз" АҚ-ы мен "ҚазақОйл" серіктестігі сұйытылған газдың тоннасын 23 мың теңгеден өткізіп отыр. Зауыттар өз міндетін атқарғанымен, бекеттерде жағдай басқаша. Бұған қарапайым жүргізушілер де күмәнмен қарай бастады. Олар бұл бағаны  тағы да көтеру үшін қолдан жасалып отырған тапшылық деген пікірде. Себебі, 20 мың көлікке жеткілікті газ жергілікті жерде өндіріледі. Энергетика министрлігі шекті бағаны  30-шы қыркүйекке дейін бекітті. Күзге қарай бағаның өсетінін немесе сол күйі сақталатынын ешкім дөп  басып айта алмайды.