Футболдан балғындар арасында достық кездесу өтті

Ақтөбе-отандық футбол астанасы болуға лайық. Ал бұл стадион талай жеңістің куәсі болды. Аты аңызға айналған футболшылар мен тарихи матчтардың талайы осы жерде өтті. Содан болар, өңірде футбол десе ішкен асын жерге қоятын балғындар қатары жыл санап өсіп келеді. Бірі-Роналдо мен Мессиге еліктесе, енді бірі Самат Смақов, Марат Хайруллин, Қайрат Әшірбеков пен Андрей Сидельников сынды аты аңызға айналған ағаларына ұқсағысы келеді. Бүгін орталық стадионда 100 бала өздерінің сүйікті кумирлерімен бір алаңда ойнады."Ақтөбе" футбол клубының 5 ойыншысы балғындармен доп қуалап, қақпаға гол соқты. Бұл-жеткіншектер үшін стимул. Сүйікті командасының ойышыларымен бір алаңда жүріп, бақ сынасқан қара домалақтардың қуанышында шек жоқ.Талайдың сүйікті спортына айналған футболды бірі теледидардан тамашаласа, бірі арман қуып жастайынан спорт мектептеріне барады. Солардың бірі 9 жастағы Тілеужан. 1 жылдан бері кәсіби шұғылданып жүр. Аулада достарымен доп қуалағанды ұнататын балғынның арманы асқақ. Өз болашағын да осы спортпен байланыстырады. Ал сүйікті кумиры барселоналық Ламин Ямаль
Шараның басты мақсаты — балаларға спорттық рух сыйлау, салауатты өмір салтын насихаттау, сондай-ақ қаламыздың басты спорт нысаны — орталық стадионның 50 жылдығын атап өту,-дейді ұйымдастырушылар. Матч соңында бүлдіршіндерге балмұздақ таратылып, естелік сыйлықтар мен футболшылардың қолтаңбалары табысталды.

Количество показов: 84
Дата создания: 16.07.2025 06:13:28